古天后日誌｜港股高位反覆 現水平值博率有限

6月7日，多雲，有驟雨及狂風雷暴，早上雨勢有時頗大。隔晚美股先升後回，早段三大指數表現唔錯，但喺10年期美債息重上3%下，升幅縮水，市場資金再度變得保守，最終三大指數升幅水瓜打狗，唔見一大截，道指升幅僅餘16點；標指跟納指分別升12點及48點。

大魔又嚟魔笛追魂，其首席美股策略師威爾遜指，企業疲弱嘅盈利指引為拖累美股嘅最新因素，股價短期內或於目前水平徘徊，直至第二季業績期來臨，股價根據業績表現再跌或見底。佢更預期，標指將於8月中後期貼近3400點水平，即係相對隔晚收市價4121點再跌超過一成。

美匯指數走強不利股市

不過美國投資者又唔係一面倒睇淡，高盛首席經濟學家哈哲思相信，勞工市場出現回軟迹象，通脹亦漸見緩和，經濟仍朝向「狹窄的軟着陸道路上。」但市場已預期美國聯儲局喺未來兩次仍要加息半厘，10年債息回升。而美國商品期貨交易委員會(CFTC)數據顯示，對沖基金正沽空美國國債，5月底槓桿基金嘅10年期美國國債期貨錄淨淡倉，為自2021年1月以來首次，意味對沖基金押注孳息率走勢將向上。另一方面，美匯指數再度走強，對股市嚟講唔係好事。

至於港股噚日喺成交略為增加至1385億下挾升571點，不過咁嘅升幅唔夠1400億成交，其實市場肯追貨嘅資金有限。雖然唔少好友認為大市呢轉反彈可以挾升至22000至22500水平，但為咗呢一千幾百點去追貨，值博率有限。尤其美股嗰邊搖搖欲墜，有乜冬瓜豆腐，任憑阿爺再出招護航，港股跟內地股市唔跟住美股插水已屬萬幸，實在好難寄望喺現水平追貨會有可觀回報。反正大市走勢仍然反覆，要買貨都等調整嗰陣，乜嘢水平先叫抵博，古天后就認為短炒可以參考恒指保力加通道，至少回到日線中軸，即係大約20500點水平，先再考慮入場。

古天后

(徐狄怡，證監會持牌人)