古天后日志｜市场静待联储局议息结果

6月15日，大致多云，间中有骤雨及几阵狂风雷暴，不稳定天气持续。美股隔晚个别发展，道指再跌151点；标指跟纳指分别跌5点及升19点。经过三个交易日急跌后，超卖后出现反弹好正常，只系大家都睇到，美股反弹力度好有限，主要系10年债息高企下，美股都唔弹得去边。

今晚联储局议息，市场都等紧议息结果，目前市场已有预测今次及下月加息幅度可能去到0.75%，只系通胀高企下，究竟仲要加几多息先可以控制通胀。联储局嘅通胀目标为息率要高过通帐2%，但最近公布嘅CPI为8.6%，咁究竟要加几多息先足够？古天后谂起都惊惊。

不过通胀主要系因为油价高企，以及供应链问题所造成，只要供应链逐步回复正常，通胀都会见顶回落，只系通胀回落速度唔够快，CPI长期高企，似乎联储局都唔可以手软，要重手加息先可以控制得住。喺加息问题困扰下，美股嚟都唔会有好日子过，因为息口上升将影响企业回报，当美债息进一步上升至4厘水平，试问仲有边估愿意投放资金去股票市场，而唔转投被视为无风险资产嘅美债。 

重点系美股过往十年大牛市升浪，都系由高增长嘅科技带动，低息环境下，呢类唔赚钱嘅公司，透过高杠杆，低息借贷，任性地烧银纸去争占市场，谷大个市销率。但当利息高企，市场已再唔提供平钱，烧钱成本高企，呢类企业自然站唔稳脚，估值重评下自然被大幅抛售，甚至企业本身亦无法经营落去。

美一旦陷衰退 需求自然减

虽然美国总统拜登已意识到有需要减关税，希望藉此可以压抑通胀输入，只系当伤害而造成先嚟减关税，似乎已迟咗一步。至于中国嗰一边，减关税系好消息，只系呢三年疫情期间，因为中国嘅锁国政策，已逼使唔少生产线外移，已迁离嘅生产线，系唔会又搬返去中国，减关税只会系一个短暂刺激，长线靠此拉动中国制造业嘅影响有限。同时美国经济一旦陷入衰退，需求自然会减少，减关税亦唔会拉动美国需求。

睇返香港呢边，港元噚日又再触及弱方保证，逼令金管局出手接货，美息上升吸引美元回流美国实属正常，人民币疲弱下，内地想透过放水减息谷经济难度大增，因为咁做只会进一步令资金流走，阿爷放水与否，进入两难局面。虽然以目前银行体系已囤积达3000亿结馀，走一百几十亿嘅影响相当有限，只系美息上升下，港元保持息率不变，两者之间息率愈拉愈阔，资金自然会继续流向利率更吸引嘅美元，咁资金流走下，港股又可以强得去边。所以古天后一直维持上落市睇法，一日无法解决港股缺水问题，港股都只系喺区间移动，目前移动区间约为20000至22000之间。

古天后

(徐狄怡，证监会持牌人)