關心妍紅館騷海報曝光囡囡隨時上台做嘉賓

2022-04-21 08:00

隨着第五波疫情緩和，闊別紅館十年的關心妍（Jade）宣佈6月4日及5日在紅館舉行「關心妍 Jade Kwan 約 20周年演唱會」，Jade更專程到紅館拍片向歌迷報喜，開心表示：「其實都擔心受疫情影響，但今年是入行20周年，很希望可以舉行今次Party慶祝。呢日出嚟影Poster，囡囡就係最擔心嘅一個，因為之前佢都冇得出街，叫我帶多幾部消毒淨化機先好除口罩。」

Jade大讚囡囡有天份，但未知對方會否「願意」擔任個唱嘉賓：「平時同佢做Live就只是對住個鏡頭，未知她對住現場觀眾會否怯場，所以要花些時間做心理輔導，睇吓臨場她Ready未，不過她都話想和我同台唱歌。」

此外，剛拍完海報的Jade正忙於籌備歌單，希望開一個「冇廁所位」的騷，笑謂：「因為Fans都餓咗咁耐，都會唱些他們喜歡的歌，所以好頭痛！有些歌可能沒派台，但我估他們都會想聽，所以首首都想擺入歌單。」Jade還預告歌衫由陳華國操刀，並已操Fit腹肌，揚言會有驚喜送給歌迷。