獨家丨王梓軒怕折壽唔敢變長壽節目 《演鬥聽》入圍台慶五大好驚喜

 由TVB總經理曾志偉欽點，交由王梓軒主理嘅音樂節目《演鬥聽》入圍台慶五大「最佳綜藝節目」，惡鬥大熱節目《聲夢傳奇》及《好聲好戲》，梓軒覺得《演鬥聽》玩創新但仍被公司肯定絕對係奇蹟，而且仲會有第二季，非常滿足！但梓軒就唔想《演鬥聽》成為長壽節目，因為每集錄成14個鐘以上，怕短命喎。採訪：方騫平 攝影：沈健程

王梓軒對《演鬥聽》入圍台慶5大「最佳綜藝節目」好滿足。

 

王梓軒正籌備第二季節目。

 

音樂人Chris Polanco為王梓軒及《演鬥聽》出咗唔少力。

 

王梓軒喺表演上會延續《演鬥聽》風格玩即興創作，觀眾好受落。

 

音樂人Chris Polanco曾經跟劉德華、陳奕迅及張學友等合作，亦係王梓軒《演鬥聽》團隊成員，為咗還人情債，梓軒日前為Chris Polanco舉行嘅音樂學校派對擔任嘉賓，於師生及家長前獻唱《my grown-up christmas list》，由於反應熱烈，再延續《演鬥聽》風格玩即興創作。

音樂人Chris Polanco亦係王梓軒《演鬥聽》團隊成員。

多謝曾志偉畀機會

問到曾志偉拍板製作的《演鬥聽》會否增加奪「最佳綜藝節目」優勢？王梓軒就話唔關事：「其實TVB每個節目都要經過志偉同王祖藍通過，咁當然一定要多謝志偉畀機會，當初係由佢提出要咁做，出分力幫助小朋友。我哋唯一優勢係用新面孔，而且團隊肯搏肯做，乜都肯試，希望觀眾都助養吓班小朋友，支持吓我哋。」

《演鬥聽》由曾總拍板製作。

梓軒稱節目入五大好鼓舞，已在討論開第二季，有唔少嘉賓都想請：「有Gin Lee、AGA、側田及林奕匡，其中同張敬軒做第一季前已經咬牙切齒，話點都死個期出嚟幫手，所以今次要預多啲時間同佢度期。」問到想唔想《演鬥聽》成為一個長壽節目？梓軒笑言，「我怕我會折壽，因為真係做得好辛苦。」

 

《聲夢》學員文凱婷(右1)及張馳豪(左1)係第一季嘉賓。

 

梓軒第二季想請張敬軒做嘉賓。