古天后日誌｜年結將至宜守不宜攻

12月29日，大致天晴，天氣乾燥，氣溫略為回升。美股隔晚個別發展，Santa Rally效應下，道指再升95點，不過標指創收市新高後跌4點，標指則下跌89點，主要係變種病毒全球肆虐，避險情緒升溫。雖然標指再創新高，同時超過三百間企業腶價創52周新低，咁嘅況曾出現過3次，都發生喺1999年底，2000年科網股爆破前夕，即係目前美股情況跟當時相似。加上，呢一個並非單一現象，目前紐約交易所掛牌嘅上市公司當中，6周移動平均線創新低企業數量多過新高，上次出現呢個現象係2015年7月，當時標指亦創下一年新高，但接住落去6個月則出現回調，期內跌幅近14%。

有分析指喺美國經濟降溫嘅同時，聯儲局卻同步收水，呢個當然對大市不利，不過咁唔代表美股要即時大幅回調，只係警號響起，大家要提高警覺。咁啱得咁橋，契媽Cathie Wood近日大幅減倉，旗下基金公司ARK Investment周一大規模拋售其持倉，甚至旗下全線基金都「只沽不買」，一反常態好似平時般咁選擇轉倉。呢個舉動令人憂慮，佢係咪睇到市場出現一O的其他人睇唔到嘅危險訊號。與此同時，美國唔少交易員亦開始進行對沖，大舉買入睇跌嘅期權，為美股可能出現較大幅度調整做好準備。

對於美股出現大回調，講都講O左一段時間，其實市場早有準備，始終美股位高勢危，出現較大幅度調整亦合情合理，可憐港股愈玩愈縮，恒指現價更較年初高位低一成幾，若然美股有乜事出現大調整，全球股市定必受累，港股亦能獨善其身，但估計跌幅未必要跌足美股，只係氣氛難免再受影響。古天后已多次提醒大家要做好風險管理，目前只宜輕倉，不宜進取，保留實力，待大市回調再撈貨，今年只餘下兩個半交易日，明日又係期指結算，反正聖誕假期前已提早收爐，呢兩日都係少做少錯，只守不攻，等待下周新年過後開局再作定奪。

古天后

(徐狄怡，證監會持牌人)