拳王│黃子恒落場打真軍學高難度動作 監製爆料睇Playback激動落淚

TVB台慶劇《拳王》昨晚（29日）講到葉迎風（黃子恒飾）以駿風拳館代表身份打入泰拳冠軍賽，迎戰石傲山（黎耀祥飾）旗下拳館Gavin Fitness的代表。拳賽甫開始，迎風因舊患復發處於下風，但憑住驚人意志扭轉劣勢。眼見勢色不對的祥仔，出口術令金爺（李國麟飾）向拳賽評判施壓，最後迎風含恨落敗。細心觀看該場賽事，除了發現胸膛操得相當結實的子恒弗到漏油外，其拳腳功夫亦相當有睇頭，尤其踢腿動作，不但有力，而且踢腳踢得相當高，足證他下了不少苦功。

監製Andy坦言該場拳賽戲難度極高，故劇組已事先安排替身給子恒外，負責動作指導的冼灝英師傅亦沒有為子恒設計太高難度動作；不過子恒自我要求高，除堅持所有動作親身上陣外，並即場要求冼師傅教授高難度動作，務求令拳賽拍得逼真。監製更透露子恒拍畢該場戲後睇Playback時激動落淚。
子恒指最感動是cut機後現場所有人、包括台前幕後均為他鼓掌：「其實好多動作我之前都未做過，到真係做到嗰吓其實好激動亦好感動；我成日諗如果我畀唔到難度高嘅動作出嚟，我會對唔住葉迎風呢個角色。」他又感激飾演其對手的陳偉洪說：「對手好緊要，如果大家有留意踢膝嗰吓其實相當近，佢為咗拍出嚟效果好，好肯『硬食』我啲招式，佢咁樣令我啲動作做得更加放心。」

另外，迎風在昨晚播出的一幕雨中落寞戲份亦相當有意思，海正藍（張振朗飾）想起當年哥哥正曦（譚俊彥飾）在生時，亦曾因不公平的制度輸掉拳賽而耿耿於懷，似是暗示正藍與迎風將有與哥哥一樣深厚的緣份。而近期被力讚好戲的譚俊彥，全程含淚訴說自己有多不甘心，充份演繹出拳手的辛酸及對公義的堅持，難怪視帝呼聲高。子恒指該場戲最難忘是好凍：「嗰日得11度左右，我當時嘅戲份係棉質嘅短衫同裋褲，一瞓落地超級索水同埋超級凍，好彩嗰日現場有風筒咋！」