獨家丨陶大宇唱《倒轉地球》被惡搞 笑問保錡係咪想死

劉德華喺1996年推出嘅《倒轉地球》，忽然間喺25年後翻hit，全因為有元祖級「師奶殺手」陶大宇加持，佢幾乎每次登台都會唱呢首飲歌，甩bit嘅「魔音式」唱腔，加上「水潑式」獨有台風，但無論點都係用堅定嘅眼神繼續淡定唱，超級洗腦！

ERROR成員保錡噚日就拍咗條惡搞版《倒轉地球》，完全模仿大宇嘅表情同唱腔，《頭條娛樂》今日都有聯絡大宇，問番佢會唔會嬲？估唔到大宇超大方，唔嬲之餘，仲話好開心帶咗咁多歡樂畀大家，佢以短訊回覆話：「我最近的確是倒轉咗個地球，希望大家安全無事🤣🤣🤣！其實可以帶比（畀）大家開心、歡樂，咁咪好囉！令人談論、令人快樂，我可以做到，我覺得比（俾）佢哋更開心。」

問到會唔會怪責保錡扮自己？佢話：「其實保錡以前都扮過我…係我同ViuTV拍《辣伙頭》個節目上面，可能有人覺得佢有少少似我，今次佢又扮我，我無嬲……好明顯，除了有少少鍾意我，就係想死！」然後再加咗超過十個哈哈笑emoji，咁仲有冇合作機會呢？大宇話：「如果有機會合作就要早少少通知🙏，我要揾Sunny幫我練吓舞。」

其實惡搞大宇版《倒轉地球》，保錡絕非第一人，喺內地多個平台已經出現好多過「倒轉地球陶大宇」版本，當中包括「公路版」、「籃球運動員版」、「大學校園版」等等，香港方面亦有人整咗張潛力圖，話已投票畀大宇做「叱咤我最喜歡男歌手」，又有人留言：「畀佢入Alfred（許廷鏗）嗰隊啦」，非常搞笑。