星宅大曝光｜楊詩敏珍藏郭富城閃咭 住村屋奉行斷捨離

由郭偉亮（Eric）、黃芳雯（Paula）、霍嘉恩（Gracey）主持的香港開電視全新節目《星宅大曝光》，下周一（29日）播出首集，Eric與Paula走訪了楊詩敏（蝦頭）位於清水灣的村屋住所，蝦頭表示對村屋情有獨鍾，除了可以養寵物外，亦可以享受大自然氣色，展現了蝦頭鏡頭以外琴棋書畫「平靜」一面。蝦頭說：「我鍾意住村屋，因為鍾意藍天白雲，大自然吸啖空氣都清新好多，我有少少難住番巿區密集式嘅大廈。」

蝦頭與媽媽同住700呎村屋，她表示：「同屋企人住，係超級大嘅學習，因為我18歲已經搬出去住，去啲男朋友屋企同居，避開家人，可能以前細個唔識點同家人相處，直至兩年幾前，機緣巧合地想照顧媽媽，初時感覺『呢鋪大劑』，不過住落之後一啲事都冇，原來佢都好體恤、好開放咁面對（新相處模式）。」

蝦頭住所以簡約風為主，奉行斷捨離。她謂：「之前我係將所有嘢擺晒出嚟，會將啲公仔、玩具放喺個架度，但個架冇玻璃封住，擺到封晒塵，之前睇咗本書教人斷捨離同收納方法，於是我就跟住做一次。」蝦頭將所有雜物都收納在膠盒，盒裏不乏有記念冊、舊戲飛以及大疊「郭富城閃咭」，期間蝦頭表示現階段可以將其中一箱物品進行斷捨離，Eric聞言笑說：「如果你係男仔，我會Expect呢箱係鹹書！」Eric被問到有否儲鹹書，他說：「冇儲過，全部都係借番嚟！細個時候冇鹹書，全部都係睇我爹哋嗰啲，男仔好少儲呢啲嘢，通常借人。」