方媛化身《美女與野獸》貝兒 城城單膝跪地重現童話經典一幕

郭富城有份主演嘅新戲《掃毒3》日前煞科，唔使開工，當然係全天候返屋企陪靚老婆方媛（Moka），以及兩位小公主「大寶」同「二寶」。上月26日係城城嘅56歲生日，當日佢同老婆方媛襯到絕穿上紅色情侶裝慶祝，前晚（31日）萬聖節一家人又再開心歡聚。

天王嫂方媛噚日（1日）喺社交網上載相片，見佢特意打扮一番，化身《美女與野獸》嘅貝兒，穿上瑰麗黃色晚裝，妝容上亦花點心思，化咗個紅色血妝，但依然鬼火咁靚；而男主角當然係城城，西裝骨骨單膝跪地握住「貝兒」隻手，重現童話世界經典一幕。
兩位囡囡亦打扮靚靚，分別扮白雲公主及蝴蝶喺露台影相，由朝早玩到夜晚，非常盡興！網民都讚俊男美女，加可愛寶貝，簡直係完美組合。