獨家丨薛家燕想請蔡卓妍同男友落場打牌林盛斌爆黎諾懿牌品唔好

2021-11-26 02:00

由薛家燕、林盛斌(Bob) 、鄭衍峰、戴祖儀、吳若希主持嘅TVB遊戲節目《麻雀鬥室三缺一》喺下周一晚(29日)開始播出，阿Bob爆黎諾懿牌品唔好；家燕姐讚馮盈盈太「高」章法變身「站長」；而陳敏之最迷信，竟着「紅底」嚟催旺自己。她笑言最想請埋蔡卓妍同「百億麻將館太子爺」石恆聰上節目玩吓。採訪：方騫平攝影：葉君海

曾志偉獲升TVB總經理後拍板製作嘅《麻雀鬥室三決一》，招攬一班打廣東牌雀友，邊玩遊戲邊跟藝人嘉賓過招，薛家燕、林盛斌話遊戲好刺激，大家要喺座位轉移、打透明麻雀、抽上、下家牌等遊戲中食到糊，唔係咁容易。

打牌似經歷人生起伏

阿Bob讚張頴康夠機警又好運贏到4千幾蚊獎金暫時領先；至於黎諾懿手氣較差打到發脾氣，阿Bob說：「聽啲高手話，笑住打麻雀啲牌會愈摸愈靚；諾懿成晚都面黑黑，就算叫糊都食唔出，所以佢好無奈話『好似經歷人生起伏咁。』」家燕姐建議阿Bob搵埋石恆聰跟阿Sa一齊落場。

任姐醒家燕姐二百蚊

家燕姐較少打牌：「最難忘細個時同任姐(任劍輝)拍戲，任姐怕我會成日眨眼阻佢收工去打牌，於是叫我埋去話畀200蚊我買嘢食，當年200蚊係巨額，我即時嚇到瞪大對眼，咁就順利拍完喇！」阿Bob記得小時候跟同學打牌時夾埋細佬出千：「細佬睇晒3家牌之後坐喺我隔離，然後伸手喺我大髀度打手勢，但好快被揭穿咗。」