蔡卓妍39歲生日上海搞粉紅派對 滿面通紅咀嘴阿嬌

蔡卓妍（阿Sa）近日身在上海工作，因此她今日的39歲生日要在當地度過，昨晚（21日）阿Sa獲超過30位好友包括容祖兒、鍾欣潼（阿嬌）、鄭希怡及經理人霍汶希等，在當地舉行派對為壽星女慶祝，現場佈置以粉紅色為主，阿Sa置身當中依然充滿少女味道。

阿Sa興奮留言：「真係話咁快就30+9喇，快到嚇死人，不過呢39年過得都幾精采，一啲都冇白過，最大嘅收穫就係陪我一齊經歷我人生嘅所有屋企人同朋友，所有我愛而又愛我嘅人，同埋一啲素未謀面，但係都愛我嘅人，即刻我嘅小Sa瓜，Love u all，希望我哋大家都身體健康同埋有精采嘅人生！我真係好愛我嘅朋友，一日係朋友一世都係朋友。」

壽星女和一眾好友在上海外灘夜景下狂歡，眾人歎紅酒食大餐，並向阿Sa送上生日蛋糕及壽桃包，而飲到滿面通紅的阿Sa在蛋糕前攬着阿嬌錫了一啖，祖兒亦向阿Sa送上「肉嘴」作賀禮。與阿Sa拍拖多年的男友石恆聰未有在相中出現，不知他有否到上海跟女朋友慶祝，不過石恆聰的胞妹石佩藍卻有留言，以錫錫公仔送上祝褔，可見阿Sa和男友一家感情要好。