陳山聰賀老婆生日缺席TVB台慶 享受當下冧爆講愛的宣言

昨晚（19日）TVB舉行盛大《萬千星輝賀台慶》節目，賀公司邁向55周年，動員全台近二百演員及歌星現身支持。不過，昨夜卻未見陳山聰、胡定欣及單立文幾位街坊之友現身，原來台慶日子撞正山聰太太Apple生日，山聰和胡定欣分別在社交平台貼相，見到他們齊齊食晚飯賀Apple生日，開心切蛋糕之餘，另一主角當然是囝囝陳霆軒(Jaco)，鬼馬笑容動作勁搶鏡，爸爸抱着兒子一副有仔萬事足！

山聰深情留言：「妳快樂所以我快樂，老婆：1119 Happy Happy birthday. love you forever n ever. 等咗八年，依個老婆唔話得，今年一家人齊齊整整慶祝，感謝村民，大佬醒完又瞓，瞓完又醒，已經好配合，享受當下，珍惜一切，感恩。」Apple也在社交網分享感受：「Happy birthday to me ! 好耐都冇試過正日一齊慶祝，有家人有好朋友一齊食餐飯就係最好嘅禮物。」

好友胡定欣也貼相祝福：「祝您身體健康，甜甜蜜蜜，幸福快樂！陳生陳太第一次正日慶祝生日，村民齊賀，JACO醉完又醒再醉過，2支唔夠再嚟2杯，私下約定村民結婚紀念去BBQ，結婚週年關村民咩事，開心至上，請密切留意我同JACO感情最新動向。」山聰自2013年回巢TVB後，翌年認識太太Apple共墮愛河，今年是結婚兩周年紀念，兒子的出現令他更珍惜家庭樂，今次難得與太太共度生日，一家溫馨愉快。