關寶慧愛麻甩佬 想找靈魂伴侶

　　(星島日報報道)有「鬼后」之稱的關寶慧，相隔15年再為香港開電視靈異節目《怪談．一路好走》與探靈網紅AP一起擔任主持，更到訪墳場、荒廢凶宅等地點拍攝。命格屬陰的關寶慧，透露18歲時首次遇見靈界朋友，曾經有師傅為她「封眼」，但五年後又能夠見到，雖然見到靈界朋友經驗豐富，反而令她愈見愈驚。

　　關寶慧表示：「接觸愈來愈多，能夠感應到，佢哋太易搵到我！因為我靈力增高，愈來愈容易感應到，包括聲音、樣貌，所以愈見愈驚，驚係怕有求於我，幫到無問題，幫唔到怕會弄巧反拙搞到我。」關寶慧笑言本身有戴住平安符在身，每次為該節目拍攝後回家入門之前要跨過火盤，才入屋到神枱前裝香給觀音菩薩，然後做儀式才可以沖涼清潔，她說：「我睡覺前仲會唸心經迴向畀靈界朋友，自己會講：『唔好意思，打擾晒！』因為工作而走去打擾到人哋（指靈界）。」對於工作方面，關寶慧坦言要適合才會參與，不會像以前證明在影圈的存在而任何種類都接拍，反而會更關注健康，她笑說：「《怪談》咪好囉！一星期拍一次，幾開心又有益身心！」

　　此外，關寶慧對於因半月內連續兩次跟黃日華吃飯敍會而傳緋聞，她說：「佢真係慘，我諗佢以後唔同我食飯，大家朋友嚟啫！華哥個人好好又靚仔，佢係我兒時偶像，十年前同佢合作拍劇而認識，之後一路有聯絡！唔好講佢，唔想好似攞佢嚟講咁，總之佢係一個非常好嘅人！」單身的寶慧，坦言想找到個靈魂伴侶，較喜歡麻甩又man的男士，既照顧別人亦很細心，她說：「最緊要心靈溝通得到，希望畀到自由對方，大家又互相明白可以終老。現在無追求者，但我都等緊，師傅話我呢幾年有，如果無就無㗎啦！」