P1X3L無份入圍《叱咤》出Po大呻 慘變樂壇隱形組合網民鬧爆環球

昨午，66位香港歌手出席《2021年度叱咤樂壇流行榜頒獎典禮》記者會，好耐未試過有大型音樂活動記者會，出席者有前輩有後輩有MIRROR亦有炎明熹，人才濟濟超熱鬧。


今年《叱咤》將頒發49個獎項，當中最大改動的是「叱咤樂壇生力軍」。往年新人獎只設金、銀、銅獎，今年因應樂壇新血湧現，大會將繼2012年度後，再次將獎項分為「叱咤樂壇生力軍男歌手」、「叱咤樂壇生力軍女歌手」及「叱咤樂壇生力軍組合」，三個獎項皆設金、銀、銅獎，由三個獎變九個獎。另外記招上也公布，今年的樂壇新人將獲邀在明年3月重返亞博，享受2021年生力軍限定的舞台。

今年有份角逐生力軍獎項的單位有MIRROR的Lokman和Edan、ERROR的肥仔及193，還有MC張天賦、ANSONBEAN、張進翹 (Manson)、曾比特、薛晉寧、李妍、張蔓姿、石山街、惡夢扭蛋、before the night ends、MC $oHo & KidNey 和吳家忻，男新人絕對是惡鬥，睇睇吓，「就算跌崩一隻牙齒」都好多人識唱㗎，P1X3L呢?


P1X3L對於連《叱咤》入場券都拎唔到好唔開心，輪住出PO大呻，Marco話「我都想嚟㗎」，George訧話「看見一班新人可以同台出席，但偏偏沒有我們係真係難受」，Phoebus 留言，「點解會係咁?」連唔係Fans嘅網民都戥佢哋慘，仲話環球唔識捧人就唔好浪費佢哋時間，「雖然唔鍾意佢哋但點解可以連入圍都冇」，「環球搞到P1X3L咁樣 仲點做落去。」唱咗成年慘變隱形組合，除咗同情都唔知可以講咩好。