獨家│符曉薇抱埋個女約友食Tea 忙搞童裝生意都要唞吓氣

陳柏宇（Jason）同符曉薇（Leanne）結婚4年，育有一女，生活看似很美滿。不過Leanne喺5月自爆因宮外孕要做人工流產手術，痛失第二個小朋友，當時好多網民都安慰佢。近來陳太繼續忙於工作，心情都似乎平復返。日前抱埋個女陳羿辰（Abigail）同好姊妹食完Tea，再買定外賣返歸食，睇嚟佢除咗做KOL，近來又搞埋童裝生意，忙到飯都冇時間煮！採訪：梁志明

囡囡Abigail啱啱夠3歲，雖然行得走得，但小朋友出街行咁多路，腳仔又點會唔攰呢？呢日Leanne喺銅鑼灣同朋友食完Tea，紥住辮仔的Abigail已經面露倦容，要扭媽媽抱抱。Abigail睇嚟真係「冇電」嘞！上到電車媽媽撩佢傾偈都冇Mood，但坐得幾個站又唔瞓得，睇見都辛苦呀！而Leanne都好熟知囡囡啲「電量」，等落車之際已經二話不說抱起囡囡，另一隻手扶住扶手，盡顯媽媽好臂力。

冇時間煮飯買外賣頂檔

Leanne早排「疫」市下投資七位數開童裝店，平時仲Keep住做KOL接Job出Post同開直播。工作已經夠忙，平時老公Jason要開工，佢就要一個人湊女，有時無奈地都要做吓「無飯主婦」。呢日佢返屋企途中，就去咗天后一間粉麵店，買咗二人份嘅外賣返屋企。睇嚟老公Jason又去咗開工，Leanne惟有同囡囡撐枱腳。