独家│符晓薇抱埋个女约友食Tea 忙搞童装生意都要唞吓气

陈柏宇（Jason）同符晓薇（Leanne）结婚4年，育有一女，生活看似很美满。不过Leanne喺5月自爆因宫外孕要做人工流产手术，痛失第二个小朋友，当时好多网民都安慰佢。近来陈太继续忙于工作，心情都似乎平复返。日前抱埋个女陈羿辰（Abigail）同好姊妹食完Tea，再买定外卖返归食，睇嚟佢除咗做KOL，近来又搞埋童装生意，忙到饭都冇时间煮！采访：梁志明

囡囡Abigail啱啱够3岁，虽然行得走得，但小朋友出街行咁多路，脚仔又点会唔攰呢？呢日Leanne喺铜锣湾同朋友食完Tea，紥住辫仔的Abigail已经面露倦容，要扭妈妈抱抱。Abigail睇嚟真系「冇电」嘞！上到电车妈妈撩佢倾偈都冇Mood，但坐得几个站又唔瞓得，睇见都辛苦呀！而Leanne都好熟知囡囡啲「电量」，等落车之际已经二话不说抱起囡囡，另一只手扶住扶手，尽显妈妈好臂力。

冇时间煮饭买外卖顶档

Leanne早排「疫」市下投资七位数开童装店，平时仲Keep住做KOL接Job出Post同开直播。工作已经够忙，平时老公Jason要开工，佢就要一个人凑女，有时无奈地都要做吓「无饭主妇」。呢日佢返屋企途中，就去咗天后一间粉面店，买咗二人份嘅外卖返屋企。睇嚟老公Jason又去咗开工，Leanne惟有同囡囡撑枱脚。