炎明熹靠幻想投放感情 與《聲夢》學員拍劇最怕眼神交流

TVB節目《星夢傳奇》三料冠軍得主炎明熹（Gigi）最近推出新歌《真話的清高》，仍在求學中的Gigi趁空擋宣傳新歌，昨日（1日）在姑丈的陪同下，到商台接受鄭裕玲（嘟姐）的節目訪問。

眼見Gigi從學生變成歌手，Gigi的姑丈坦言心情有點忐忑：「我哋都冇諗過咁快，始終佢都仲係細，要讀完書先，點知有呢個機會出現咗，變咗而家係另一個階段，所以會喺佢身邊幫吓，到佢18歲就交番俾佢自己。」稍後Gigi將會參與電視劇演出，嘟姐問她是否已經收到劇本？她說：「收到，我又冇呢方面嘅經驗，超級緊張，又有少少尷尬，尤其係要望住對方交戲！不過我都覺得拍戲都有好處，尤其作為表演者，係一個儲經驗嘅方法。」

接着嘟姐又問Ｇigi如何投放感情？她說：「我個人好鍾意幻想，得閒會幻想一啲悲慘嘅嘢，又會靠吓啲導師同老師幫吓手。不過我而家比較重要係返學，好彩唱歌對學業影響唔大，同同學之間嘅相處亦都冇乜大問題，佢哋都好支持我。」至於要同時兼顧拍劇和唱歌，嘟姐坦言拍劇的確有點辛苦，要有定心理準備，Gigi反問：「嘟姐你有乜嘢Tips畀我？」嘟姐笑說：「叫定姑丈幫妳煮嘢食。」 Gigi笑說：「佢只係識用水煮熟雞胸肉同西蘭花！」