方力申Dry足4年自認眼角高 擇偶條件：見完要掛住

現年41歲的方力申（小方）是圈中難得的「億萬筍盤」，年前被指以近五千萬在元朗買入一間董事屋，加上珍藏了過百件合共數千萬元的藝術品，7月更榮升做馬主，身家豐厚！不過，小方的感情生活就似乎好dry，與鄧麗欣分手後，雖然與不少女神何超蓮、馮盈盈和陳瀅等傳過緋聞，但全部都是「冇米粥」。小方日前接受鄭裕玲（Do姐）的電台節目訪問，自認眼角高，已經4年沒有拍拖。

小方說：「我4年冇拍過拖，連啲男仔朋友都唔信我，話你冇拍過拖，中間都有啲散拖啩，但我都冇喎。」Do姐指他眼角高，他直認不諱：「係嘅...第一，成日有人話女仔好主動會埋身，喺我身邊從來都冇發生過，真係一個都冇。如果有呢，我話畀大家知，我定力好低㗎啫，但係冇。第二樣嘢呢，如果我唔夠鍾意一個人時，又未必想同佢一齊，又唔想令到人哋唔開心，又唔想分手做衰人。」

Do姐表示這是一個惡性循環，小方認為世界上有好多男人和女人都跟自己一樣，並自爆有玩交友APP，他說：「我發現都好多質素高。（嗰度識唔到咩？）識唔到呀，我都有去Like過人，但佢冇Like番我；有女仔Like我又冇Like番，比較難啲囉。」

小方亦有透露心中的擇偶條件：「我見完會掛住佢，有咩鍾意又想同佢一齊去食咁囉。」他指自己的私生活低調和被動：「我4年冇約過女仔出街食飯，我係想拍拖，但我豁唔到出去。我一定要結婚，因為人要有伴侶，一定要搵到個自己鍾意嘅伴侶。」