獨家│有樓有生意大把Job 50歲小儀慳家買特價短褲

50歲的阮小儀被封「黃金剩女」，有樓有車仔麵店又有大把出鏡機會嘅當事人強調單身都可以好快樂。冇拍拖11年嘅小儀近年情傾MIRROR嘅呂爵安(Edan)，開到口鍾意，難得ViuTV有人收到仲開埋節目畀佢兩個一齊做節目，變身「正印」嘅佢好得「爵屎」(Edan Fans稱呼)歡心，冇男朋友又點?有Edan又有一班同道中人，最緊要攞正牌收錢同Edan做節目，有咩爽得過咁呢?採訪:譚壹致

日前下午兩點幾，小儀獨自去又一城行街，佢先去UNIQLO睇衫，見佢係咁行，雙眼好凌厲咁望到實，務求唔好錯過任何啱佢嘅衫同褲，行到掛短褲嘅位置即停低，見到短褲有會員限定優惠，原價$149，特價$99，仲有多色選擇，小儀即刻揀咗幾條，有啡色有灰色又有黑色，多幾條替換，成日落雨晾唔切都有褲着啦。

果醬買得好
揀完試完畀埋錢，小儀邊講電話邊行去馬莎，馬莎超市最出名嘅薯片同糖佢冇買，反而去揀果醬、餅乾同茶包，買晒都唔使150蚊，每個位置都停留一陣，一臉心大心細，睇嚟冇買開，想買嚟試吓。揀咗半個鐘終於揀到心水，畀完錢就行去停車場攞車走，見佢上車後都Hea咗一陣先開車，睇嚟見攰喎。