視參加比賽為人生鍛煉 何晉樂：好想快啲有自己嘅歌

TVB人氣節目《聲夢傳奇》第二季的的招募行動進行得如火如荼，近日找來《聲夢》學員接受「See See TVB」FB專頁訪問，分享參賽的感受，當日比賽晉身4強進入總決賽的何晉樂（Rock）是其中一位，在訪問中他坦言感覺像發了一場夢：「冇諗過個節目會咁成功，估唔到比賽係會令人忍唔住想喊，本身比賽就係你同我鬥，你死我活架嘛！」

Rock還說：「諗番嗰陣入咗去第一round，可能開始有少少成績，俾咗信心我繼續行落去，加上認識咗佢哋14位，更加令到我係唔想走，好想一齊行落去。邊個foul咗大家也唔願意，會鬧導演點解要foul呀？明明唱得好好，捱鬧最多係導師，邊個被foul都一定係佢哋嘅錯，冇一個人係應該被foul。」重看3個月前的影片，Rock說：「而家比以前有自信，唔會再諗埋一邊，做每一件事都盡力去做，諗最好嘅結果，即使感覺條路係難行，就努力一點，見到身邊有咁多可以幫到自己的人，點解唔開口問一聲呢？呢條路係一定難行，但遇到14個咁好嘅朋友，呢條路唔孤單。」

有否曾經想過退縮及卻步？Rock說：「一定有，成件事唔係咁簡單，鍛煉，呢個係一個鍛煉，成件事對我嚟講，失去嘅嘢係好少，有好多嘢係要取捨，可能你入咗嚟呢度，錯失咗出面好多機會，但係你唔入嚟呢度，錯失嘅機會係會更加多。」他續說：「如果你係想入呢一行，想唱歌同做創作，其實你可以入嚟試吓，呢度係一個好好嘅起點，勇敢啲行多步。」至於將來的計劃，Rock說：「我好想好想快啲有自己嘅歌，好想寫歌俾身邊嘅人，好想同好多人合作，其中一個係蓮姐，好多嘢想挑戰，仲有拍劇，初初係好抗拒，覺得又要學多啲新嘅嘢，唔知要啲古裝劇又或者超時空，但係而家見到啲劇集，又覺得好有趣，揣摩吓角色又好興奮。」