慶幸有朋友陪追夢 姚焯菲：冇諗過自己可以行到今日

姚焯菲（Chantel）在TVB歌唱比賽《聲夢傳奇》中，雖然不敵炎明熹（Gigi）而屈居第二，不過她的人氣依然強勁，試過憑《戀愛預告》被網民大讚，點撃率已超過四百萬，同時她更被不少廣告商睇中，成為廣告界的寵兒！日前Chantel應「See See TVB」FB專頁邀請，以師姐身份呼籲大家報名參加第二屆《聲夢》比賽。

在大螢幕上看到之前拍下的一段短片，Chantel立即一臉尷尬地笑，不時用雙手遮住塊面，搞笑兼可愛，接着聽到片中的Chantel自問自答地說，「我講咩好呀？你俾我諗吓先，我真係講唔到呀！唔知點解好想喊呀！」她更加不自在，後來更搞笑地說：「我懷疑嗰日飲咗咖啡，所以情緒就會有啲失控，可唔可以CUT咗佢呀？」

主持人問到Chantel有否記得當初參加《聲夢》的目的，她想了一會說：「其實落手報名係因為真係鍾意唱歌，冇諗其他原因，同埋覺得呢個係好好嘅機會去試其他嘢，就算唔入都好，可以參觀吓TVB！到入咗第一round之後，唔知點解有一種動力好想去完成呢個比賽！」Chantel更坦言沒有想過自己可以行到今日，沒有想過大家會着緊這件事：「慢慢同Yumi（鍾柔美）、Windy（詹天文）同Gigi（炎明熹）佢哋friend咗之後，真係好彩有呢班朋友陪住，如果唔係每日都會好驚囉，有咗佢哋就會安心啲。」

當中最大的得着，Chantel說：「一定係識到呢班朋友，好耐都冇試過，即係有咁一大班嘅朋友，個個都做到friend，一齊去追夢，好似唔係得自己一個咁孤單。」再問有否後悔過參加比賽？Chantel說：「其實有㗎，當我好眼瞓嘅時候，我就會話：『唉！早知唔參加喇！我就可以返屋企瞓覺。』如果我冇參加比賽，呢一刻應該會喺屋企打機食嘢或者做功課！」她續說：「而家嘅生活係好充實，對我嚟講係好事，因為我好鍾意忙，唔鍾意冇嘢做呢個感覺！」最後Chantel向未報名的朋友作出呼籲：「當你自己未俾人發掘你嘅可能性之前，一定會有啲唔知做乜嘢嘅感受，但係當你入咗嚟之後，會有人同你講有乜嘢可能性、你邊方面係叻，佢就會慢慢幫你增強嗰樣嘢，你就可以變成SuperStar。」