【獨家】Anson想為偶像做「黎明熱狗」 大廚Ricky輕鬆出戰唔怕輸
2021-09-09 22:16 
由兩位大廚張錦祥(Ricky)及黃亞保領軍嘅真人騷《煮戰》愈嚟愈緊湊，連埋周一晚最後出線嘅Ken，出戰Round 2嘅仲有Ka Sing、菲菲、Alan、Anson、詠儀，6強即時向保哥及Ricky挑機，當中包括Ricky對菲菲；保哥及好勝詠儀嘅師徒大戰，Ricky輕鬆講明唔怕輸，因為佢係獨孤求敗！採訪：方騫平 攝影：沈健程
由張志明監製嘅《煮戰》贏得收視同口碑，「限廚令」後頭炮係威係勢。周二晚Ricky同菲菲以「香港情懷餐」率先進行晉級賽，縱使菲菲最後出動埋老公幫手都不敵師傅，輸得心服口服！反觀Ricky就輕鬆自在應戰，他笑說：「我有不死身唔怕輸，夠膽就過嚟，都係同佢哋交流吓啫！」
隊員好有創意
Ricky幾欣賞Anson喺第1 Round賽事中做嘅「一雞三味」，可以用盡雞嘅每一部份做食材，一啲都唔浪費，Anson被讚好開心，如果要設計一道創意菜送畀人，他好想試吓做「黎明熱狗」：「黎明係我偶像，我留意到佢好鍾意食熱狗，我會用煙肉包住兩條腸再加入特別汁醬。」至於詠儀做學生餐盒對決保哥，她帶笑投訴保哥：「我睇《煮場爭霸》見保哥爭一分輸咗畀Ricky，所以今次我參加《煮戰》係想同保哥爭返一口氣，點知佢唔珍惜我，唔揀我入佢嗰隊，不過最後同佢對決都好有火花。」另外，Ken唔敢好似強哥咁窒主持人江美儀：「我哋冇乜時間理主持人問題，總之答到就答，其實佢好幫我哋。」
最新回應