拍《七公主》素顏兼唔准洗頭 陳瀅欠自信：監製要我好樣衰

陳瀅（Jeannie）自從簽約邵氏之後，一劇接一劇，最近熱播的《七公主》亦有份演出。不過Jeannie在劇中飾演Moon，是一個由內地來港生活的苦命少女，大部分時間都要素顏上陣，與其他「公主」黃翠如、林夏薇、高海寧、江嘉敏及鄺潔楹能扮靚靚出鏡有好大差距。

Jeannie日前接受由阮兆祥、天欣和朱菁主持的電台節目《1圈圈》訪問，直言這個苦命角色，是她拍劇以來「最唔enjoy」一套，因為角色充滿負能量，而造型方面，監製陳維冠（Joe）要她拋棄靚女形象，完全不讓她化妝和洗頭，還嫌她不夠憔悴，要再「殘啲」，她說：「Joe唯一要我化妝嗰一日，竟然問我『係咪真係冇化妝』，我話『Joe，你攞張紙巾抺吓塊面，我真係冇化妝！』佢抺一抺，真係冇妝喎，但佢仲話『搞唔掂，你眼圈唔夠大，幫我畫深啲。』我話『Sxxt！你真係要咁做？』。」她自爆在拍攝前有勤力護膚，所以經常被監制懷疑她是否化了偽素顏妝，而事實是沒有，但承認剛開拍時身形特別脹，她解釋：「因為當時剛隔離完。」

Jeannie自言不化妝出鏡會欠缺自信：「我始終係一個女仔啊嘛！而家見慣人係某一個樣㗎嘛大佬！其他女仔個個都係set晒頭，化晒妝，咁我就企喺側邊……所以我想講呢套劇我從來冇睇過playback！我一張相都冇影過！」 她相信監製找演員時，是希望角色能為演員帶來突破，她笑言Joe可能覺得︰「陳瀅，我要你好樣衰！」

不過，當監製要求她不用洗頭，她卻暗地歡喜，她笑說：「我喺公司出晒名唔鍾意洗頭，有時入化妝間，髮型師都唔想幫我set頭，試過拍《黃金有罪》時，足足一個星期冇洗頭，因為唔鍾意吹頭。」