【獨家】拍《七公主》暴瘦入晒戲 監製陳維冠讚翠如演技有進步
2021-08-19 23:50 
由陳維冠監製的TVB新劇《七公主》上周首播，該劇以黃翠如做「膽」拖高海寧、林夏薇、江嘉敏、陳瀅、劉佩玥和鄺潔楹主演，陳維冠大讚黃翠如演技有進步，好入戲。就外間對翠如演技嘅批評，陳維冠代為平反：「冇乜人天生識做戲，在乎個演員對角色了解有幾多！」採訪：方騫平 攝影：梁志明
黃翠如喺劇中飾演涼薄、表面不近人情嘅大律師，顛覆黃翠如溫暖、樂觀嘅性格。陳維冠坦言最鍾意另一種玩法，畀人睇到佢嘅另一面，務求觀眾睇得過癮，演員演得過癮，幕後拍得過癮：「所以開拍前我要求佢切合角色再落磅，只要有一日連佢媽媽都擔心佢有事，就代表佢夠入戲同埋成功咗！果然不出所料，翠如媽媽見個女日漸暴瘦，有追問翠如係咪有乜唔妥？所以我同編審鄭成武對翠如演出都好滿意。」
睇好鄺潔楹
陳維冠仲花多咗時間同翠如圍讀及研究角色，令她更吸收有深層次演出：「我覺得呢個演員受太多批評，壓力大到透唔到氣，其實做呢行要忠於自己，佢嘅初心係做好戲，所以唔使諗太多，我亦唔使同佢做心理輔導，重點係消化劇本同理解角色。」至於武哥大讚翠如肯用心及努力做戲，態度正面，點解唔畀機會佢發揮？」另外，陳維冠大讚鄺潔楹夠醒目又幾入屋，睇好佢係明日花旦；而陳瀅素顏演窮家女，係好暗黑嘅角色，陳維冠笑說：「本身要求佢又瘦又乾，點知佢喺加拿大食肥咗返嚟，所以話好對唔住我。」
關鍵字
最新回應