【獨家】舉行紀念展覽傳遞愛要及時 陳積榮女友望做藝術治療師幫助病患

前TVB藝人陳積榮（Jeff）今年5月因肺癌離世，跟他拍拖10年的女友李凱淇(Lillian)為Jeff舉行展覽會，到時首播Jeff偷偷為Lillian創作嘅求婚歌《記住我們》，回憶當日片段，Lillian哭著說：「我喺ICU聽完首歌，見講唔到嘢嘅Jeff眼角帶淚，我同佢講『我收到喇，我答應求婚但來世再相見！』」採訪：方騫平 攝影：張詠森 場地：JOMO Kitchen & Health Hub

「《記住我們、好好說再見！》個人展覽 」由本月27日至30日於中環Annex舉行，Lillian希望令大家對Jeff有更深入嘅瞭解及傳遞「愛得及時」信息。Lillian眼中嘅Jeff冇脾氣仲好好人，好顧別人感受：「佢從來冇放棄過抗癌，所以冇諗過咁快會離開，世上冇乜人好似佢咁勇敢，而且佢好努力，為咗追演藝夢就算冇人工都一直做呢行，遺憾才華未展現。」

少啲埋怨多啲欣賞
Lillian明白每個人都可能會有懷才不遇，工作亦會遇到挫折，甚至健康出問題嘅時候，她提醒大家少啲埋怨，多啲抬頭去欣賞呢個世界而唔係所有嘢都向錢看：「每個人、每件事、每個經歷喺生命上都有得著，Jeff嘅離世對我嚟講失去好多亦都得到好多，朋友話『你以後冇乜嘢再驚！』我希望將學到嘅嘢幫到人，日後成為藝術治療師，原來陪伴、聆聽、同分享對病者好重要。」