拍攝期間落大雨 周國賢心痛私伙古董相機被淋濕

周國賢（Endy）和王嘉儀（Sophy）日前合作拍廣告，Endy化身古典代表，與現代派的Sophy到山頂取景，儘管拍攝期間落大雨，仍擺出型格Pose盡顯專業。開工期間，Endy用菲林相機及私伙相機周圍拍照，坦言幾萬蚊的古董相機被大雨滴濕少少都幾心痛，但為拍攝效果都要頂硬上。早前Endy獲香港導演會頒發「影帝」殊榮，他坦言獎項為拍攝團隊打下強心針：「要多謝台前幕後所有嘅人，話俾人知原來周國賢都識做戲㗎喎！」

至於Sophy不時露出小蠻腰，流露青春氣息，她笑言：「因為試完衫之後，知道要露腰影相，我專登食得清淡啲、戒零食，每日都有練吓腹肌。而家影完終於可以食餐勁嘅，不過嚟緊要準備音樂計畫，要開始做歌，過返日夜顛倒嘅生活，應該唔使節食都會好瘦。」