【獨家】銅鑼灣行大運乜都睇吓　周國賢行街周圍摸狂捽眼

周國賢（Endy）原定去年4月舉行處男紅館騷，未料年初傳抑鬱復發，自前年10月拍畢電影《一秒拳王》便一直沒有公開露面，連唱片公司也無法聯絡他，搞到個唱都要取消！神隱多時，原來Endy與家人飛往外地上靈修課程，至去年底他終於積極參與幕前工作，包括為《一》片宣傳、為Serrini及KOLOR擔任演唱會嘉賓，並宣佈回歸樂壇。日前《頭條日報》記者發現Endy到銅鑼灣「行大運」，他試完Cream又揀榴槤，但最後都冇幫襯。採訪：梁志明

周國賢於IG透露正投入錄音工作，還表示養傷一年今年要「全面還債」。日前晚上9時許，身穿白恤衫襯黑褲、戴Cap帽的他，獨自到時代廣場的LOG-ON行街。繞實雙手行的Endy見到好多花款的口罩，即駐足攞上手研究，但睇咗兩睇便開始篤手機；之後繼續行周圍望，雙眼勁攰的Endy不停用手捽眼，雖然香港疫情持續放緩，但啱啱先摸完其他嘢似乎唔多衛生喎！

齋行零使錢
接着經過美容區，曬到好黑的Endy估唔到都幾貪靚，拎起一罐369蚊的真皮修復活肌面霜搽上手，徹底捽勻兩隻手後都係冇幫襯，隨即走到隔離的citysuper睇嘢食。可能Endy好耐冇出街，見佢對好多嘢都好有興趣，例如泰國干腰榴槤，繞手彎腰睇完一輪，就行去揀散件裝，全程逗留15分鐘左右，最終Endy乜都冇買便搭的士走人。