【得獎時一片空白】發表「遲來的感言」炎明熹承諾日後做好每一個表演

16歲的炎明熹（Gigi)在《聲夢傳奇》決賽當晚，以大熱姿態連奪三獎，成為三料冠軍。Gigi分享得獎感受時喊到收唔到聲，今日Gigi終於在IG上載一篇「遲來的感言」，逐一多謝台前幕後、屋企人同一班粉絲。

Gigi更表示得獎嗰陣個腦一片空白，她說：「首先多謝TVB俾呢三個大獎我，當時我真的一片空白，我想講攞到獎並唔係我一個人嘅，攞到呢個獎我要多謝一班台前幕後嘅工作人員、導演、形象顧問Janae及她的團隊、髮型師、化妝師、跳舞老師、Johnny 團隊，還有我地既主理人李生、譚生，六位星級導師、森美老師，你哋一直看待我們這班聲夢學員好似仔女咁，我喺你哋身上學咗好多唱歌及以外嘅嘢。還有後來加入的張生，一樣對我地盡心盡力，能夠同到咁多位專業歌手合唱，我真的很難忘。」

佢仲特別多謝音樂總監Johnny老師，為佢編咗好多好歌，又話對方彈琴彈到手指都受傷。之後佢仲多謝14位戰友，陪佢一齊成長。當然唔少得音樂老師高晨維，同埋屋企人、粉絲，仲話佢哋嘅支持就係佢繼續奮鬥嘅動力。最後，Gigi 仲承諾之後會盡力做好每一個表演，用行動來報答觀眾嘅支持。