晒棟高腳豪邁水著照麥明詩坐姿吸引方力申自薦做游水教練

2021-06-01 08:38

29歲的「十優港姐」麥明詩（Louisa)「升呢」「亞視一姐」火速拍完網劇《逐流時代》後，經已恢復打工仔身份，全職做返商業顧問。不過，麥明詩被指進化成「女神」謝安琪，唔止愈嚟愈靚，仲愈嚟愈富貴，之前分別手持20萬炒價嘅Hermes 金扣舵鳥皮Mini Kelly bag同埋炒價28萬嘅特別綠Kelly bag做開工「道具袋」，好架勢！因為呢啲特別款，即使係專屬會員肯配貨都未必買得到。

名牌包包價值一百幾十萬算等閒，早前她以低市價逾兩成價錢，把屯門「納米樓」單位轉讓畀母親何小娟，回復首置身份後，再聯同哥哥麥明山重錘出擊，兄妹以1,678萬元買入長沙灣一個私人屋苑高層C及D室相連單位，真有本事。

Louisa有學歷，有樣貌、有身材，吸金力堅強！昨日她喺社交平台分享水著照，身穿黑色一件頭運動款泳衣，豪邁地腿張開，棟起一隻腳，另一隻腳就屈住坐，坐姿帶點誘人。她英文留言：「I love swimming. The tranquillity, the solitude, the freedom. （Also swimming helps burn fat and good for joints）我喜歡游泳，寧靜、孤獨、自由。（游泳也有助於燃燒脂肪和良好嘅關節。」游泳健將方力申見post即留言問她：「要上技術改進課程嗎？」麥明詩心心眼回覆：「好喔！」

就算麥明詩今次冇谷胸，但奔放豪邁嘅坐姿都贏晒，網民滿心歡喜肯收貨，紛紛留言：「女神」、「果然出水芙蓉」、「坐姿差啲，但夠型、豪」、「美腿女神」、「好fit」、「sexy」、「係咪瘦咗？」、「想同你游」、「股惑」，有網民甚至咁留言：「五官醫美進化得剛剛好，夠晒靚啦！有排唔使搞啦！」