【獨家】YOLO女常同家姐打交恨做打女　蘇凱倫望跟呂爵安拍喜劇

現年22歲的太陽娛樂新人蘇凱倫（Helen），簽約經理人公司4個多月，十次有九次試鏡都唔中，早前終獲選中參演ViuTV單元劇《YOLO的練習曲》，與另外19位網絡女神扮女團，仲盛傳ViuTV有意捧她們做「女版MIRROR」，雖然未知會否成軍，但Helen自爆是呂爵安（Edan）的粉絲，更希望跟對方合演歡喜冤家。撰文：黎寶倫　攝影：譚壹致　化妝及髮型：Sakura Chow　服裝：PENNYBLACK

港產男團MIRROR近期人氣爆燈，對於一班「YOLO女」傳組女團，蘇凱倫說：「唔係好清楚，但有機會組女團，我都好希望可以參與，因為細個都鍾意聽Kpop，都有過女團夢。（ViuTV有安排工作？）暫時未有。」除了唱歌跳舞外，她坦言對演戲也有興趣，最恨拍武打片做「打女」，只得中國「舞」功底的Helen笑道：「我冇學過武術，都係同家姐打交。（邊個贏多？）媽咪，佢一叫我哋就停手。（玩女子摔角？）通常畀家姐摔，希望有機會學泰拳。」

怕醜認「爵屎」
至於再拍ViuTV劇，想跟哪位男神演對手戲？Helen即怕醜認是「爵屎（Edan粉絲專稱）」，又自爆為見偶像一面，碌盡「人情卡」取得《全民造星II》總決賽門票，她說：「當然希望同佢合作。（親熱戲？）咁又唔使，可以合作已經好開心，最近睇《考有Feel》覺得佢好幽默，我都想同佢演搞笑朋友或情侶。」談到Edan冇偶包，Helen表示不介意配合對方扮醜，可是同門的黃曦誼（Candy）因與姜濤合作而傳緋聞，惹來粉絲不滿，她猶豫數秒後說：「可以同Edan傳緋聞係我嘅榮幸，相信大家都會明白只係工作啫。」而事實上，Helen與大7歲的圈外男友感情十分穩定。