【跳舞Battle】AL暈低愛犬見死不救 肥仔@ERROR露腩肉彈地秒殺193
2021-03-16 17:00 
ERROR成員肥仔（梁業）出名跳舞實力好強，但竟然被隊友193（郭嘉駿）挑機！肥仔昨晚於IG上載一條影片，並留言表示：「193無啦啦話要同我鬥舞，笑到我！無謂（令佢）出醜，我求其跳兩嘢算！」他相當「禮貌」咁即場跳咗幾吓應戰，不過輪到193跳舞時即刻變到好搞笑，手長腳長嘅193明顯動作好笨拙，最後肥仔使出「彈地」絕招，瞓身喺地下彈彈吓嘅佢仲露出大嚿肉，咁賣力梗係秒殺193啦！一班網民紛紛留言大讚肥仔：「機已屈」、「好靈活」等，雖然193繼續被人笑：「小心wave到斷手」、「形體大師193」，但都有粉絲讚佢舞功有進步：「點解193協調咗咁多」、「進步神速」、「33終於唔係一跳舞就頭部以下癱瘓嘅男人，感動」。
另一邊廂，MIRROR成員「教主」Anson Lo（AL，盧瀚霆）亦在愛犬Amber面前晒舞技。Amber本身睇得好Enjoy，搖頭擺尾咁，不過此時AL突然扮暈低！相信呢個時候一眾神徒（AL粉絲稱呼）都會即時上前關心，不過Amber只係疑惑地兜咗個圈就走咗，令AL忍唔住大呻自己唔夠Amber最愛嘅無花果吸引！
關鍵字
最新回應