【獨家】扮MIRROR吸咗好多「鏡粉」 OP以唐奕聰遺作面對逆境
2021-03-11 23:04 
環球唱片樂隊ONE PROMISE近期兩首大熱作品《懷念晴朗的雨天》及《明年見》都係由已故太極樂隊成員唐奕聰(Gary)監製，對於Gary突然離世，四子難以接受，惟有將傷痛化成動力。之前OP邀請咗MIRROR成員Jer(柳應廷)合作推出《明年見》Duet Version，為面對逆境帶來共鳴，亦能為自己打氣，希望唔好嘅嘢可以快點完結。採訪：方騫平
新歌《明年見》除咗係唐奕聰跟ONE PROMISE合作嘅最後作品外，亦因為OP鼓手Anton手指骨枯，寓意他要好好休息，所以對Anton而言，歌詞好到肉，他說：「因為醫生建議休息一年，為怕拖累兄弟曾打算退出，但佢哋全部好支持我，要我留低。」文迪堅持，Anton雖然休息，但OP會繼續做落去。喺疫情下冇得出Show，加上少咗個鼓手，OP喺演出上都會有新玩法，包括會拍多啲網上短片同Fans互動。
多謝Fans高抬貴手
之前OP跟MIRROR「撞封面事件」迴響好大，尤其Anton效發Stanley(邱士縉)露背，文迪扮眼定定嘅姜B等。天衡笑說：「唔係扮，係撞橋，咁啱大家諗緊嘅嘢一樣！」文迪呻好慘：「冇人敢扮姜濤，所以搵隊中最醜樣嗰個扮，你諗吓我幾大壓力！好彩都有人讚我有小小似。其實扮得最差嗰個係我，姜糖評價我面色太黑，顏值差好遠，都多謝佢哋高抬貴手，踩得唔係好應。」因為咁玩嘢，天衡直言多咗MIRROR Fans追蹤OP及留言，產生咗化學作用，都算幾得意。Anton唔怕得罪MIRROR忠粉：「𠵱家啲年青人都講得笑，明知我哋係玩，而且我哋同Ian、AK都合作過，知道大家都講得笑。」
最新回應