入行首個生日獲粉絲送驚喜 《造星III》陳澤言落茶飲店打卡嗌感動
2021-03-16 12:45 
ViuTV節目《全民造星III》上年掀起全城熱話，十強選手、外號「神經刀」嘅CY（陳澤言）憑酷似陳奕迅嘅聲線成功跑出。今日（16日）係佢入行後第一個生日，經理人同一班fans原本預備為佢搞粉絲見面會，惜疫情關係，活動最終未能舉行。
不過fans們仍好有心，為同佢慶祝呢個咁有意義嘅日子，自發搞咗唔同嘅生日應援活動。除咗製作了CY嘅表演精華片段放上IG落廣告外，佢哋仲整咗唔同嘅應援物品，包括印上CY頭像及「Happy Birthday」字句嘅杯套、書籤、postcard、貼紙及小卡等，並放喺銅鑼灣同旺角兩間台式飲品店供大家索取，一班fans仲用心喺店內佈置打卡位，壽星仔CY亦專誠刊落去茶飲店打卡，更大嗌好感動。今日凌晨CY就喺IG貼岀蛋糕慶生照，踏入25歲的他留言：「又大一歲，但今年很特別，係我正式入行後第一個生日。雖然未能同一班支持我嘅你地（哋）一齊慶祝，但你地（哋）每位嘅祝福，我收到晒。」他又轉發Fans應援嘅相，並附上心心表情符號多謝大家。
雖然CY出道只係好短時間，但已經迅速吸納咗一大班粉絲，果然係「人氣王」。上個月開咗個人YouTube Channel嘅佢，為答謝Fans嘅支持，也特意準備了一首Cover送給大家，還留言催小編快啲趕工派福利，他預告：「Channel小編趕工中⋯⋯晏D（啲）⋯⋯又或者明天（17日）上架。」其實決賽完咗之後，CY都一直默默耕耘，除咗拍節目《囝囝女女730》同廣告，亦製作咗第三首派台Cover，嚟緊仲會參加慈善活動，佢仲預告今晚10點會同大家開live慶祝生日。
最新回應