【關結婚事？】網友「召喚」馬國明撐住　湯洛雯忽然出Po嘆遇荊棘

湯洛雯（靚湯）與馬國明（馬明）自去年6月公開戀情後，愈愛愈高調，仲經常於社交網隔空傳情閃盲一班網民，難怪拍拖一年未夠便屢傳婚訊。早前，有報道指兩人將於今年拉埋天窗，湯爸更以靚湯名義購入約2千呎的馬鞍山雲海別墅Lily Avenue單號別墅，作為超豪嫁妝，後來靚湯也於IG Story放聲氣，揚言：「既然你哋咁想，如果，我係話如果呀吓，佢今年冧莊（視帝），就結啦！」

可惜獲全城集氣，馬明最終都失落今屆視帝，無法「找數」的靚湯近日接受邵氏節目《Master's Talk》時，就大呻被催婚催到厭，仲忍唔住開口話：「人哋都未求婚，咁我點答你啫？訂婚一定會講，大家唔使再問，一定公開。」來到鼠年最後一日，靚湯忽然有感而發於IG留言：「人在路途，難免會遇到荊棘和坎坷，但風雨過後，一定會有美麗的彩虹，更好的一定在前面等着我們，只要相信。 #感謝和感恩2020帶給我的一切 #得到的失去的 #讓我們更珍惜身邊的一切 #預祝新年快樂 #一定會好起來 #lawofattraction #throwback」

一班網民即「召喚」馬明為她打氣：「有馬明同你撐過去嘛」、「有馬明，明天會更好」、「我收到風，馬國明年會有動靜」、「你背後的男人永遠都支持你」等，亦有人繼續催婚，期待「湯馬」今年有好消息公布。至於男主角馬明，就以一貫作風用6個「戴超型樣」及「手瓜」Eomji回覆女友。