【獨家】Lokman運滯拜神求安心 姜濤誤爆《太平》被劈死結局

2021-02-01 23:09
姜濤跟Lokman講《太平紋身店》的劈友戲太興奮,姜B更誤爆被劈死結局。
姜濤跟Lokman講《太平紋身店》的劈友戲太興奮,姜B更誤爆被劈死結局。

姜濤同Lokman(楊樂文)@MIRROR有份參與ViuTV原創劇《太平紋身店》演出,姜濤演黃德斌囝囝,而Lokman就做德斌年青版。提到兩人首次演古惑仔,兩人都好鬼興奮,仲大講劈友難忘戲份,不過姜B竟然愈講愈high,唔單止講到德斌因他太重,孭唔起的搞笑情況,更加唔覺意誤爆自己慘死一幕。而身為MIRROR隊長的Lokman近年似乎工作量不算多,他就解釋只因疫情影響令工作經常有阻滯,更自爆有去拜神求個安心。撰文:杜淑霞 攝影:譚壹致 服裝:initial Fashion

姜濤跟Lokman講《太平紋身店》的劈友戲太興奮,姜B更誤爆被劈死結局。
姜濤跟Lokman講《太平紋身店》的劈友戲太興奮,姜B更誤爆被劈死結局。
姜濤同 Lokman加入MIRROR後,首度合作拍劇,可惜兩人冇同場戲。
姜濤同 Lokman加入MIRROR後,首度合作拍劇,可惜兩人冇同場戲。



劇中姜濤跟黃德斌和周秀娜都有不少對手戲,面對型男和女神他承認有壓力,「當初知道係佢哋後,我本身拍戲經驗唔多,所以去到(現場)都唔夠膽出聲,好彩兩位都好肯教我,娜姐比較傾偈傾得多啲,德斌前輩就問佢之前拍戲嘅經驗。」他承認因德斌比較cool,搞到他最初有啲驚,「佢本身又好大隻嘅一個人,跟住呢把聲又沉,又貼住鬚喎!造型好猛,真係傾落去唔係咁樣,好隨和。」


講到角色,姜B更加雀躍,因為有機會初嘗劈友,「我九成嘅戲係鬼角色中度過,唯一一個做人嗰場戲,人生第一次打戲,嗰日好好玩,由細到大都好鍾意睇古惑仔嗰啲戲。(當自己浩南?)冇冇冇,純粹覺得好好玩,有武術指導即場教你點樣做,喺中環條街度,我哋3個人打50幾個人。(一個唔止打十個?)係呀!但最尾我都係死咗!」原來劇中姜B慘被斬死。


Lokman認為打戲好難控制,又易發生意外,拍時相當大壓力,「我以前有學過吓少少武,但係到拍嘅時候真係好唔同,攞支棍就打,武指好彩係識嘅,佢哋叫我放心打,但係都有一兩吓都搞唔掂,演嘅時候認真得滯,劈劈劈,啱啱打中咗佢哋。雖然有練習過,但係現場氣氛有啲緊張,又有好多樣嘢要顧,混戰咁,好驚打親人,又好怕唔用力唔似,要再拍多次。」姜濤都好認同Lokman話寧願畀人打好過,「有一場同(吳)保錡打放心啲,哈哈!因為佢係朋友,打咗都唔緊要!」

講到德斌孭唔起重磅姜B,兩人扮晒出力樣勁搞笑!
講到德斌孭唔起重磅姜B,兩人扮晒出力樣勁搞笑!
姜濤演的「葉天晴」於「611事件」慘被斬死,令演其父親「葉蓋天」的德斌極度難過。
姜濤演的「葉天晴」於「611事件」慘被斬死,令演其父親「葉蓋天」的德斌極度難過。


寧願演戲唔單飛


不過,講到最難忘戲份,姜B首選跟德斌生離死別一幕,「我死得番一啖氣,佢要喺我死前同我講嘢,因為有大班fans喺隔籬睇住我斷氣嗰吓,我又知自己重喎!佢又好想拉我,但拉唔起,我feel到佢想拉,我嗰吓吸住啖氣,我好想笑!(佢咁壯都拉你唔起,你嗰排好重咩?)都重㗎!總之好搞笑又好尷尬,要攤喺條街度畀佢咁。拍嗰場戲之前佢仲問我,『喂!你幾重呀?』我話好耐冇磅,70幾是但講咗個數字。(Lokman:求個安心啫!)咁佢聽完嗰個數字,『咁我唔抱你啦!』佢本身諗住孭我走!」至於Lokman就最難忘扮10幾歲戲份,「我班兄弟,有《造星II》嘅Marco(葉振弘)同埋Tiger(邱傲然),我覺得最難忘要拍番中學生嘅時候,17歲嘅時候,好耐冇着過校服,點樣演番細細個呀?!可能佢哋容易啲,但後尾大家拍得最好,因為唔理囉!推推撞撞咁一齊玩,反而嗰時拍得最開心。」



除客串《男排女將》同這次《太》劇,以及最近主持的《囝囝女女730》外,比起其他成員,Lokman演出機會不算太多,但他解釋只是近期比較運滯,「其實唔係冇預,點知係咁啱,譬如舊年年中,我本身會過日本拍一個旅遊特輯,,但因為疫情所以冇咗,成日我有呢啲問題,有啲情況就冇咗。」記者提議他過年去拜神,點知他竟然自爆,「我有去拜,前幾排有去拜吓神,同埋因為年中我又拍咗套電影未上到,拜一拜求個安心。」談到未有機會單飛出歌,Lokman完全唔介意,「有自己一套戲會開心啲,演戲同唱歌都好玩,但係我鍾意演戲多啲,問心嘅,唱歌我冇乜非常非常非常大嘅信心佔到一個席位嘛!」

初次飾演古惑仔,仲有劈友戲份令姜濤好興奮。
初次飾演古惑仔,仲有劈友戲份令姜濤好興奮。
Lokman演「葉蓋天」年青版,霸氣十足。
Lokman演「葉蓋天」年青版,霸氣十足。
劇中Lokman與Marco有劈友戲,但最怕打到對手。
劇中Lokman與Marco有劈友戲,但最怕打到對手。
姜濤承認最初見到德斌時有點驚。
姜濤承認最初見到德斌時有點驚。
初次跟娜姐合作,姜濤大讚對方好健談。
初次跟娜姐合作,姜濤大讚對方好健談。
Lokman在劇中跟《造星III》KiKi(張凱娸)結婚,即係KiKi會演姜濤媽咪。
Lokman在劇中跟《造星III》KiKi(張凱娸)結婚,即係KiKi會演姜濤媽咪。
Lokman與顏卓靈有份主演的電影《狂舞派3》,因疫情遲遲未能上映。
Lokman與顏卓靈有份主演的電影《狂舞派3》,因疫情遲遲未能上映。
最近Lokman有份主持節目《囝囝女女730》。
最近Lokman有份主持節目《囝囝女女730》。
關鍵字

最新回應

關鍵字

相關新聞

熱門文章