Solo MV齊上YouTube熱門 Edan難忘喊位 肥仔自稱唐僧肉畀女圍

繼姜濤、Ian（陳卓賢）、Anson Kong（江𤒹生）、Anson Lo（盧瀚霆）、Jer（柳應廷）先後推出Solo大獲好評後，MIRROR的Edan（呂爵安）與ERROR隊長肥仔（梁業）亦在昨日單飛出道。二人日前分別為新歌拍攝MV，Edan變返學生跟林家熙（Locker）、譚旻萱（Mandy）大玩三角戀，夠晒青澀；另一邊廂，肥仔收起搞笑形象，以多個「型男」Look上陣，各具特色！


兩個MV已於昨晚8時在YouTube正式公開，Edan新歌《E先生連環不幸事件》觀看次數已超過13萬，打入熱門影片第8位；至於肥仔的《Lady Killa》亦有超過5萬次瀏覽，熱門影片排行第14位。成績唔錯，兩位睇嚟可以放下心頭大石嘞！

Edan的新歌《E先生連環不幸事件》講述三位好朋友之間的「三角戀」故事，填詞人黃偉文（Wyman）更為Edan度身訂造，將他「黑仔」的特質配入歌詞。而Edan亦在MV出動私伙鋼琴大晒琴技，又特別返母校可風中學取景，難怪他表示新歌別具紀念價值：「感覺好特別，近幾年都冇返過母校，熟悉嘅環境更容易入戲。」中學時期熱衷參與課外活動的Edan笑言是風頭躉：「實不相瞞，中學時我都被稱為『男神』，低年級嘅女同學好多時會崇拜師兄，搵佢哋影合照。」


當中一場「攤牌」戲，三位主角更要情感大爆發，Edan表示：「呢場戲係最難忘，因為喊戲對我嚟講難度極高。我本身唔易喊，好彩兩位對手表現好好，我都畀佢哋嘅情緒感染。」Edan坦言首次單飛心情緊張，咁有否向MIRROR的兄弟取經？他擰頭說：「冇刻意取經，大家風格唔同，各有歌路，不過好彩有佢哋之前做咗個榜樣畀我睇，等我知道應該點樣做。」

同日推出新歌《Lady Killa》的肥仔，邀請到模特兒關雅芳（Vagary）做女主角之外，更出動半百工作人員及10多位舞蹈員拍MV。為配合MV風靡萬千少女的主題，肥仔Chok爆以多個型男造型上陣。首度單飛出歌的肥仔大叫緊張，他不僅花了近兩個月籌備MV，更刻意減肥上陣，又碌盡人情卡搵朋友幫手：「MV入面自己好似一塊唐僧肉，有好多女仔圍繞身邊，基本上已經拍盡人生所有膊頭。」畀女圍可有艷福感覺？肥仔小心表示：「唔敢講，因為全部都係識咗好耐嘅朋友。」


肥仔早前拍《男排女將》成功向鄧麗欣（Stephy）「抄牌」，為何不邀請對方做MV女主角？他表示自己太怕醜：「都有諗過搵Stephy，但自己太怕醜，最後都係唔敢搵佢。其實女主角都篩選咗好幾個，最想搵欣宜，因為佢跳得、出嚟好有霸氣，有Queen嘅感覺，可惜時間配合唔到。」肥仔又透露，收到花姐通知可以單飛時非常開心，並感謝許廷鏗給予意見：「我唔係識好多音樂人，好多謝許廷鏗介紹音樂人畀我，又畀咗好多意見令我可以促成今次呢首歌。佢聽完話首歌OK，我信心都增強咗唔少。」