【獨家】開YouTube頻道寓工作於識女仔 Eric 肥谷笑師兄有女就變樣
2021-01-28 22:31 
早前，音樂人Eric Kwok（郭偉亮）與劉浩龍(師兄)及谷德昭於YouTube開設頻道《Round Table Poker》，並邀請嘉賓玩德州撲克，輸家要食最怕嘅嘢嚟大懲罰！周秀娜就因為輸咗要食濕狗罐頭加餅乾食到扁晒嘴，而JW就食超級芥辣壽司搞到流晒眼淚，至於兩歲開始唔食忌廉蛋糕嘅何超儀更食到反胃，最好笑係劉心悠竟提出食Wasabi仙人掌，去得咁盡反而嚇親大家，眾主持齊撳住佢大嗌唔好！採訪：方騫平 場地：THE STADIUM@觀塘興業街
《Round Table Poker》逢星期一及四晚上六時播出，節目中，郭偉亮同劉浩龍會將由細玩到大嘅小玩意搬出幕前，仲搵埋老友谷德昭一齊玩，肥谷笑說：「因為疫情喺屋企完全冇嘢搞，劇本又寫唔到，幾十歲人咪學吓做YouTuber，等第日熟習玩法收集到大數據時，可能發展到啲嘢出嚟拍，好似拍劇咁。」
講到節目玩德州撲克，郭偉亮說：「我細個有段日子好鍾意講大話，玩牌時只係做返以前嘅自己。今次聚埋一齊講嘅嘢都幾抵死，氣氛好值得畀觀眾感受吓，而且多啲女嘉賓係幾開心嘅，會有多啲靈感寫多啲歌，其實搵個藉口嚟識吓人。」劉浩龍笑住認同，「呢個係最好嘅機會嚟！」肥谷即笑住踢爆師兄：「有陌生女仔喺度，佢個人就唔同，好似見家長咁，得我哋幾個時又變另一個樣，所以我哋好鍾意請女嘉賓返嚟克制佢，(介紹女仔畀佢？)每個禮拜都有，仲想點呀？我哋都用心良苦，第日要好好答謝我哋添呀！散場時，見師兄爭住話『不如我送你返屋企！』即係代表呢個女嘉賓，喺呢盤牌入面表現得好好。」師兄尷尬大笑扯開話題：「好似JW咁，佢咪比想像中更活潑，而且好聰明；娜姐就有義氣；心悠夠放，平日睇唔到佢有呢一面；超儀就好有氣場，好似賭神上身咁，超有運氣。」
最新回應