【平安夜】唐唐分享哥哥三十年前私相哥迷形容係最佳聖誔禮物

2020-12-24 16:33

被封為「痴心情場劍」的哥哥(張國榮)「摯愛密友」唐唐(唐鶴德)每逢聖誕節、新年、「401」、「912」都會喺網上「派糧」嚟撫平Fans對哥哥嘅思念，今日係平安夜，唐唐提早送上一張私密相，呢張相係哥哥1990年1月22日告別樂壇演唱會慶功宴上，當時經理人陳淑芬特吔揀咗一張喺個唱上，身穿黑色閃石皮褸，哥哥喺舞台升上嚟演繹《捕風一族》嘅型男背影相，好有心嘅陳太仲製成油畫，送畀哥哥作為永久紀念，即場邀請有份出席慶功宴嘅貴賓，好似薛家燕、鄭國江、羅啟銳、張婉婷、關錦鵬、甄楚倩等喺油畫背後簽名，相當珍貴。估唔到哥哥離逝17年，油畫仍然好好收藏及保存。

唐唐留言說：「找了10年，以為失去了這份很有紀念價值的禮物！分享一下(吓)這份失而復得的喜悅，Merry Christmas n Happy New Year！」唔少歌迷大派心心，多謝唐唐分享私相簿，形容係最佳聖誔禮物。