【獨家】首度客串演劇集《使徒行者3》泰臣師弟羅雲龍恨拍動作戲

2020-12-24 10:00

泰臣師弟羅雲龍一向以玄學工作為主，但最近首次客串演出劇集《使徒行者3》，劇中他飾演Ｏ記高級警司、關寶慧的下屬，以往多數上節目做嘉賓的他，首次有角色講對白，雖然只得幾句，但已令他驚餐死，幸好最後都順利過關。曾任職海關17年的他，再着紀律部隊制服駕輕就熟；而本身跟邵氏電影很有淵緣的他，未來更希望有機會拍動作戲。採訪：杜淑霞

阿龍坦言首次拍劇感覺好陌生，特別擔心講對白，「初頭知道要演戲，第一個反應係『係咪真㗎？！』都有即刻請監製蘇萬聰唔好畀咁多對白我，唔係驚大家收唔到工，哈哈！以往上電視節目都係做訪問形式嘅嘢，有主持人問我再去答，講嘅係專長嘅玄學，今次要講對白真係唔習慣，但係幾得意幾好玩嘅。」

劇中阿龍演高級警司，他坦言以往曾任職海關17年，不時要着制服的他，對今次角色要着軍裝都有幫助，「我做海關時頭9年係做領犬員，跟住喺毒品調查科做咗5、6年度，最後喺毒品調查科做便衣，做跟蹤同拘捕工作，所以最初都成日要着制服，今次拍攝要着警司制服，都幫到吓手識得點樣着。」

望推出英文玄學書

有過這次拍劇經驗，阿龍有機會都想再嘗試，更希望有機會拍攝動作片，原來除了跟他學過跆拳道和太極之外，還跟他的成長背景有關，「我係有啲情意結，因為我第一份工喺邵氏（電影）做沖印菲林，而我阿爸同阿媽都喺邵氏認識，阿爸以前喺邵氏做劇務，阿媽就係做替身嘅，幫女演員施思替背，嗰時我成日喺片場睇人拍動作片，最記得休息時何家勁過嚟教我摺紙飛機，嗰啲畫面我仲記得，所以好想拍動作片，同埋我記動作應該易過記過對白，哈哈！」

至於玄學工作方面，阿龍除了希望擁有自己的玄學節目外，最想可以將玄學推廣到外國，「玄學唔係迷信其實係一種科學嚟，係中國嘅古文明，全部嘢都有根據，其實外國人都唔抗拒，所以我好想出英文玄學書，等多啲外國人可以睇到，同埋外國人對玄學冇乜認識仲容易接受，不過自己英文唔係太叻，真係要搵人幫手，因為翻譯起嚟真係唔容易，相信如果真係做到，對成個行業都會有幫助，我會朝住呢個目標去做。」