【心靈伴侶】有懂事愛犬陪伴 肥媽踼走抑鬱心情轉好

和肥媽（Maria Cordero）結婚21年嘅第二任丈夫Rick本月5日肺癌病逝，肥媽帶著哀痛承諾會繼續喺社交網出Post，肥媽日前在社交網拍片講老公病逝一事亦忍唔住落淚，她沉澱心情後，昨天身穿沉色衫褲，上載和愛犬互動短片，片中見肥媽為愛犬清潔毛毛，心情明顯有好轉，猛讚愛犬乖乖，又話夠鐘整骨頭畀佢哋食，幾隻狗狗更撲住去嘴她，跟出跟入。肥媽又指生前老公最錫嘅Barney日日伏喺度冇晒心機，皺晒眉頭好陰功...

肥媽寫道：「依(𠵱)幾日開始出下(吓)去，身邊的朋友都約我出下(吓)街，去行下(吓)山。留係(喺)屋企個(嗰)陣，狗狗們都會過晒嚟陪我，依(𠵱)段時間好彩有佢地(哋)，佢地(哋)好似咩都知道咁，我一行出花園，佢地(哋)就會係訓(瞓)晒係(喺)我格(隔)離。

其實真係多謝大家，我知道唔應該講多謝，但係除了多謝，我唔識講咩說話表達，好感恩有大家，大家真係好有心另外，都想同大家講我老公將會係(喺)17號設靈，18號出殯，等完左(咗)老公身後事，到時Live再見大家。」