【幸有愛犬陪伴】丈夫逝世後憔悴現身　肥媽哽咽： 真係嚟得太突然

「肥媽」Maria Cordero於周四（5日）凌晨在社交網公佈第二任老公Rick病逝的消息，事後她向傳媒透露，3年前患上末期肺腺癌的Rick因肺炎離世。沉寂3日後，剛才肥媽終於「蒲頭」更新Facebook，她上載了一條影片並寫道：「知道我老公的離開，大家都好擔心我，所以都想拍條片等大家放心。謝謝大家關心，好感恩有你地（哋）每一位的支持，依（呢）幾日家人同朋友都陪住我，心情當然未能一時三刻平復，但有大家的支持，我會加油的。我老公最後的心願都想我繼續開Live，所以等我處理好老公的身後事，一定會再開Live 同大家見面。」

片中，被3隻愛犬包圍兼送抱的肥媽，穿上黑衫、黑褲及戴黑超，不單止聲線較平時柔弱，身形也明顯消瘦不少，她說：「我都知大家好關心我，唔使擔心我，日日屋企人都嚟陪我、朋友都嚟……」說話未講完，肥媽已忍唔住聲震震想喊，沉默數秒後，她指着愛犬續道：「佢哋真係識性，睇吓幾乖？日日我坐邊度，佢哋就嚟晒邊度陪我，所以唔好擔心。我老公係半日之內自己話入醫院，最後同孫女講埋電話，然後就瞓覺，佢好安祥（離去），係我估唔到，真係嚟得太突然。佢臨走叫我多啲同朋友、屋企人一齊，因為呢排佢病，我就淨係照顧佢，呢幾年都少出街，佢叫我記得做節目、Facebook嗰啲，因為佢知我鍾意煮嘢食，我做嘅時候會好開心，佢話佢會睇，所以我燒埋Ipad畀佢。」

當講到不覺得Rick已離世時，肥媽再次哽咽說：「太突然了。我好多謝個個關心，傷心一定有，呢排幫佢辦埋啲後事先，唔係好想見人，辦埋啲後事先睇吓點啦。」她又指老公4號入院，延至5號凌晨與世長辭，當辦妥事情後，肥媽回到家已近凌晨4點，甫進門口便見到愛犬也在哭，她說：「所以你哋真係要對啲狗好啲，好有性……唔好擔心，你睇我幾多狗陪。」並感激家人及朋友百忙之中抽空來陪伴她，又希望疫情盡快消退，可以跟大家聚一聚。