首任電影策劃超緊張　衛詩雅為慳錢變「計數人」

衛詩雅（Michelle）早前為代言飲品到酒店，享受產品聯乘餐廳及酒廊推出的下午茶，她表示一直都有自製蜂蜜水的習慣：「除咗因為對身體好，飲嘅時候成個人嘅心情都會開心啲。」說到飲水習慣，Michelle自言每日最少飲8杯水，早上起床時必定先飲一大杯水，因為感覺像把整晚積聚在身體內嘅廢物沖走。她更透露每當拍電影前及拍攝期間，飲水量比平日更多，「因為我發現飲得多水，皮膚狀態會好好多，亦都容易上妝啲。」

談到剛完成一部電影拍攝，如無意外於賀歲片檔期上畫，首次擔任電影策劃的Michelle坦言非常緊張，亦了解到各個崗位的難處，「之前做演員我淨係諗演員嘅情緒係最緊要，做演員我真係會想拍咗一場笑嘅戲，之後拍喊嘅戲，但其實好多時候因為要遷就景嘅問題，而家拍咗呢個景先，咁我就唔使再走多次景，呢度應該會慳番好多錢，變咗一個計數嘅人。我理解到其他崗位嘅人嘅難處，我覺得呢一樣嘢對我第時演戲都有幫助，同埋會顧慮埋人哋嘅感受多啲。」

除此之外，她又正在籌備另一部電影的拍攝工作，「呢部電影係三、四年前已經開始籌備，所以呢部電影我又係好緊張。我哋嘅劇本改咗好多次，同導演一路傾，一路會有更新更好嘅idea加落去。加上呢部電影比較沉重，所以我預備嘅時間就更加長，同埋事前做嘅功課亦都比較多。」