萬聖節日韓藝人扮嘢最出色水原希子變巨乳仙子超驚艷

2020-11-01 19:45

昨日是萬聖節，即使世界各地疫情仍未明朗，但無損一眾藝人扮鬼扮馬慶祝嘅心。扮動漫角色又有，傳統啲扮吓吸血鬼同南瓜又有，不過最爆都應該係日本名模水原希子，超級前衛嘅仙子造型，加上離奇升Cup，成個人變咗葫蘆身形，巨乳仙子Look真係睇唔慣。

水原希子
水原希子扮仙子，聽落冇咩特別，細心一睇淺藍色假髮加上兩條長觸鬚，造型其實好破格。她更走上澀谷街頭影相，成件事夠晒Cyberpunk之餘仲好有未來感。平時瘦到得棚骨的Kiko，上圍更連升好幾Cup，真係唔知係點樣僭建出嚟。希子好認真有相又有片，片中咬埋手指，意態非常撩人。

陳家樂
上星期已收到衛詩雅Challenge的陳家樂，昨晚找數扮演動漫《鬼滅之刃》男主角「炭治郎」，但髮型就畀大家強烈恥笑，關智斌更指「好想幫你梳頭」。

關智斌
同樣收到Challenge的關智斌則扮成《鬼滅之刃》「富岡義勇」一角，他表示本身公司準備了另一角色「伊之助」的服裝，可惜「伊之助」上身要打大赤膊，Kenny又自稱食肥咗，令大家無緣飽眼福。

何珮瑜
何珮瑜（Jeana）同4位朋友打扮成《美少女戰士》的5位戰士，而Jeana就飾演Sailor Moon。當被傅穎留言問跟誰一起，Jeana即求饒表示「老公，別呷醋！」，十分搞笑。

方媛
無獨有偶，「天王嫂」方媛都係扮Sailor Moon，更留言說出Sailor Moon的變身咒語「月棱（稜）鏡威力」，不過原來她昨晚只留喺屋企「變身」，冇出去玩。

王子
王子（邱勝翊）揀咗《名偵探柯南》入面嘅「怪盜基德」，更表示自己有個「柯南魂」，唔知Stephy又滿唔滿意呢位怪盜男友呢？

沈月
邱淑貞大女沈月扮演遊戲《英雄聯盟》（League of Legends）的九尾狐「阿璃」，露出香肩同長腿，有媽咪嘅優良基因，「最美星二代」當之無愧。

莊韻澄
準人妻莊韻澄（Xenia）就化身成女警，條裙心口位絕對係一大亮點。Xenia早前表示婚後會減少行性感路線，巴打們快啲把握最後嘅福利嘞。

防彈少年團
自17年起每年都會扮鬼扮馬的防彈少年團今年回歸經典Style，七子一人笠一塊白布扮鬼，擋住個靚仔樣。不過睇返佢哋啲舊Halloween相，之前好似著得認真啲喎。

宇宙少女
韓國女團宇宙少女小分隊「Chocome」成員秀彬、Luda、多榮、夏天最近推出新歌《Hmph》，四人昨日以南瓜Look上音樂節目應吓節，可愛程度100分。

大輝@AB6IX
韓國男團AB6IX的成員大輝扮成吸血鬼，賣點唔係服裝，而係化妝。特別係額頭中間嘅子彈窿像真度極高，唔少ABNEW（粉絲名）都直言嚇親。

Celine Dion
天后級歌手Celine Dion以《魔法保姆麥克菲》主角Nancy McPhee的造型慶祝萬聖節，一身呀婆打扮完全變咗第二個人，差啲唔認得係佢！

Jimmy Fallon
金牌主持人Jimmy Fallon以吸血彊屍Look現身，兩隻吸血獠牙當然係重點，加上張牙舞爪嘅動作同黑白Filter，以為自己睇緊舊電影Cap圖。