【Headline Girls】Never Too Late　劉芷盈

女子組合Magic Gals出身的劉芷盈（Mizer）是前羽毛球青少年代表隊成員，現時私下仍有教授羽毛球，故有「最靚羽毛球教練」之稱。入行後，Mizer參演過電影《全力扣殺》、《喜愛夜蒲》等，近年就主力於內地、台灣發展，去年更亮相江蘇衛視的大型相親節目，她坦言最鍾意演戲，「我好鍾意周星馳，係由細到大嘅偶像，但佢而家好少做幕前，希望將來有機會合作。」

入行10年，Mizer也直言未滿意自己的演藝成績，「當然唔滿意啦，至今都冇好突出嘅成績，雖然有一、兩套戲大家認得，但始終都仲差啲，希望之後會有更好際遇囉。」提到每年後生靚女輩出，問到會否自覺愈來愈輸蝕？「輸蝕梗有啦，可能新入行嘅已經係00後，年紀上實輸蝕，但除此之外都冇乜嘢輸蝕，無論學歷、口才等方面，唯有繼續努力啦。（目標？）而家都唔係話一定要點紅或去到乜位，我只希望有更好嘅電影、劇集畀我演出，希望有啲新角色挑戰啦，我都有諗過去讀大台訓練班，呢個年紀可能遲咗啲，可能喺電影上睇吓有冇更多機會。」

為了突圍而出，又可會盡地一煲挑戰性感尺度？Mizer表示視乎性感尺度：「唔露點都OK嘅，露全背都OK。（太性感驚嫁唔出？）我諗呢個年代同以前唔同，以前性感女星好似舒淇咁，可能拍完（性感戲份）都仲可以畀人好清純嘅感覺，但而家真係唔得，個個人睇法都唔同，同埋好多女仔都好開放，所以（性感）都唔係一個吸引人目光嘅方法，所以我唔會試囉。」