首次個人音樂會大晒結他技藝　Michael C獲網民勁讚超班

樂壇新人Michael C的 首次個人音樂會《UNBOX LIVE - Michael C: The First Live Gig》本周一（12日）於線上進行，《頭條娛樂》facebook都有得睇。當晚Michael獻唱了7首作品包括新歌《對頻之間》外，他更大騷結他技藝，令人嘆為觀止。

對於能夠在疫情底下擁有屬於自己個人音樂會，Michael坦言十分難得，也很感恩，在音樂會上他說：「我出道已一段時間，但都未試過現場玩一set歌，今次好慶幸有兩位兄弟Ariel及Kimmy一齊玩。」由於三人都是彈奏結他，所以從歌單選曲到編曲上，Michael C都經過細心精挑，除了他的個人作品《愚公》及《對頻之間》外，李榮浩的《耳朵》是啟發他創作《對頻之間》的歌；陶喆的《天天》是他中學時常聽的歌曲；JohnMayer的《Ain’t No Sunshine》是他迷上結他的源頭；盧廣仲的《刻在我心裏的名字》及Tom Misch的《Lost in Paris》則是他近期至愛。而每首作品的編曲，都盡量用盡3支結他不同位置的聲音去編排，Michael說：「今次嘅編曲係偏向以一個結他手嘅方向出發，希望做到有3支結他但又唔重覆喺演出上嘅功能，所以大家會諗啲好特別嘅嘢，大家平時唔會彈到嘅嘢，編嘅過程好好玩。」藉着今次罕有的情況，Michael更特別設計了一段結他Solo在音樂會中獻技，有網民看到後都不禁留言大讚Michael的結他技藝高超！

今次是Michael的首個音樂會，但由於疫情關係未能於樂迷作近距離接觸，Michael都覺得有點可惜，「音樂除咗聽之外，其實仲要感覺大家連為一體嘅脈膊流動多啲。雖然唔可以同樂迷做到現場交流，但呢次都係一個學習過程，因為喺網上開Live，係要唱得更加穩陣，因為瑕疵會更加明顯，所以呢個音樂會係一個好好磨練機會。」Michael又自爆，在音樂會期間他的心情猶如坐過山車，「其實綵排時都覺得應該冇問題，但真正開始時，發現自己嘅聲同氣開始飄嚟飄去。其實作為一個新人開第一個show，有緊張係合情合理，但冇諗過緊張到咁嘅地步，然後唱咗一陣我輕鬆返少少，但之後又再緊張過，因為得返我一個人彈唱，就會緊張啲，因為始終Focus去晒我度。」經過今次演出後，Michael感恩得到更多Live經驗，而且更期待下一次可以與樂迷來個面對面交流，感受彼此的《對頻之間》。