老公教囝囝講客家話 胡杏兒大仔叫阿媽做肥杏兒

胡杏兒因為要返內地工作3個月，為怕太掛住兩個仔，所以決定帶埋一歲囝囝李奕霖（Ryan）同行。下周二就三歲嘅大仔李奕霆（Brendan）呢?因為大仔黐嫲嫲，所以就由老公Philip照顧。

Philip係客家人，平日會教吓小朋友講客家話，都話老竇湊仔秒秒都有驚喜，尋晚Philip就上載咗段片到IG，片中Philip以客家話問Brendan幾條問題，包括你叫咩名?你細佬叫咩名?媽媽叫咩名?你幾多歲呀?然後教佢用客家話講:「我係客家人」，全片最好笑係着住蜘蛛俠衫仔及帶住蜘蛛俠帽仔，玩住手指，招招積積嘅奕霆仔講嘅BB話，講自己名好笑，講媽媽名更好笑，胡杏兒變肥杏兒，Philip留言叫老婆唔使擔心，喺杏兒不在嘅日子會努力訓練奕霆仔發音，老婆回歸之時肯定完美咁話，咦，想聽吓喎。