【獨家】蘇麗珊開心同兒時偶像拍戲 黃又南透露Shine有合體機會

因為疫情影響，由黃又南及蘇麗珊主演嘅電影《冥通銀行特約：翻生爭霸戰》押後多月終於上映，原來小時候嘅蘇麗珊係Shine迷，今次同又南合作自然心心眼，仲話好想佢同天佑合體開演唱會添！雖然天佑曾說過：「No More Shine！」，不過又南竟話：「適合時間會有！」睇嚟有轉機喎！採訪：方騫平 化妝：Will Wong 髮型：Bart Choi@IL Colpo group 服裝：SPORT b.(蘇麗珊)化妝、髮型：Henry Tse@Lafe Hair Salon 服裝：O.N.S clothing (黃又南) 場地：partyland

又南在戲中飾演廢青鬼，為盡快投胎而喺陰間發憤參加爭霸戰，其間跟靈媒蘇麗珊相遇，發展一段人鬼戀故事。演「神婆」嘅蘇麗珊諗返起都驚驚哋，因為場景有成約30枝蠟燭及神壇，玻璃樽又裝住玩具bb頭，有啲陰森恐怖感覺。又南最深刻係冇接觸感動戲：「因為我係鬼，兩個人觸碰唔到，唔會有埋身動作戲。」蘇麗珊笑說：「有啲嘢未發生先係最浪漫！」

視蘇麗珊為妹妹
又南大讚蘇麗珊好吸引：「佢好得意，好似妹妹咁，我只有姐姐，成日想有個妹妹，我應該大佢好多。」蘇麗珊卻說：「最初圍讀時見到佢經已好粉絲，有啲緊張，唔夠膽介紹自己，好怕醜，我喺佢身上學到作為演員嘅專業態度。」又南表示近幾年可以再拍戲已好感恩，所以想再做得好啲，唔好令自己有遺憾。蘇麗珊最想Shine再開Show，又南態度變軟化冇否定合體機會：「認真講，我哋分開過又復合過，去年年頭又好似以前咁，因為冇乜火花，大家想停低落嚟。」又南又說總有合體一日，「不過暫時未係時候。」