【獨家】18年亞姐冠軍花盡6位數積蓄 梁雪瑤靠兼職圓夢做歌手

2018年度亞洲小姐冠軍梁雪瑤（Sheryl），最近作出新嘗試，自資6位數以獨立歌手身份，推出首支個人單曲《二人總比一人好》，原來當歌手一直是她夢想，所以不惜花掉多年積蓄，甚至當日參選亞姐，只為實現歌手夢想，而為了做個有實力的歌手，她更不斷學習唱歌及鋼琴，唯有靠繼續兼職畫則幫補開支。採訪：杜淑霞 場地：南瀛水產

Sheryl原打算將寫真書結合新歌同時推出，可惜疫情令她計劃被打亂，「唱歌同出寫真書都係自己夢想，所以早前就將兩樣嘢結合，推出寫真書《My Way》，裏面仲有四首國語歌，我仲自己親自寫詞，之後再畀創作人幫我譜曲。不過，因為疫情寫真書推出唔可以配合書展宣傳，真係影響好大，依家唯有出咗啲歌先，等疫情穩定啲先再考慮舉行簽書會，最理想當然係搞簽唱會啦！」

選亞姐為做歌手

花掉6位數積蓄自資寫真書同歌曲製作費的Sheryl，覺得能夠實現夢想一切也值得，「真係覺得好吃力㗎！差唔多用晒咁多年嚟大部份儲蓄，但係我覺得都係值得嘅，因為我真係好鍾意唱歌。」原來她17年先參加港姐入圍20強，到18年參加亞姐奪冠，一切源於想入行做歌手，「其實我讀書時已經好鍾意唱歌，但嗰時去咗澳洲讀建築，返到嚟香港做建築工作，日日喺度畫則做文職嘅工作，係比較刻板，覺得要入行就要趁年輕，於是扚起心肝搵方法入行，當時覺得最直接係選美，不過入咗行後，除咗唱歌，仲想試多啲其他嘢，譬如演戲咁，好想感受吓演繹一個角色嘅滋味。」



為了好好發展歌唱事業，Sheryl努力學習將勤補拙，現在既搵老師學唱歌及學鋼琴，亦因為這個原因她仍要做其他兼職幫補，「我由小學到大學都係合唱團成員，但係唱嘅唔係流行曲，唱法好唔同，所以我由想做歌手開始，已經有搵老師學唱流行曲，另外我好想可以自彈自唱，所以都有學埋彈鋼琴，其實好後悔細個學咗年幾兩年小提琴同埋吹法國號就放棄咗，呢行好多有音樂才華嘅人，自己唔增值就好難有競爭力，所以真係要keep住學嘢，但呢行收入唔穩定，好似呢排疫情好多工作都取消咗，唯有繼續做畫則嗰啲兼顧幫補囉！」