【獨家】喪父爆喊戲喊到走樣獲讚 傅嘉莉終於開竅拍劇冇底線

喺TVB新劇《反黑路人甲》中，飾演蔣家二小姐嘅傅嘉莉(Kelly)演技獲網民讚好，尤其首集喪父爆喊戲，喊到七情上面完全走晒樣，Kelly坦言拍攝時連幕後團隊都被感動：「呢套劇係我拍戲以嚟，第一次喊到咁崩潰。𠵱家學會演戲，可以冇底線咁豁出去。」採訪：方騫平 攝影：李維隆 場地：帝苑酒店Greenery雅苑座

劇中傅嘉莉和蔣家姊妹賴慰玲、林宣妤拍出感情，所以特別投入：「我哋3個真係好老友，現實生活中，我都好想有個姐姐及妹妹，佢哋畀到姊妹感覺我，而嗰場喪父戲係關鍵性場口，正因爸爸離世，3姊妹先出嚟撐起個社團，作為二小姐只係金融界才女，未見過社團大場面，自然會束手無策。其實我都係合情合理咁演繹，冇計算過有咁好反應，好開心。」

珍惜每場戲
除咗喊戲，今次監製仲畀多個考驗Kelly，就係第一場戲經已要同許家傑kiss：「佢好好，大家好有溝通，稍後我同佢，同埋屋企人之間會發生大事件，我喊到連對白都講唔清，個心撕裂咗，比喪父戲更加崩潰。」入行多年的Kelly自言經歷過人生高低，漸漸地多了體會，對演戲都有幫助：「明白到演戲係將個人獻畀個角色，角色要姣就要姣，作為演員要將自己放得更加低，唔應該畀自己有底線，咁樣先可以將角色更加突出，開竅之後，我更加覺得演戲好玩，𠵱家我好珍惜每場戲，會當作最後一次機會咁去做到最好！始終喺疫情下，冇人知下秒會發生乜事。」