傳戲假情真同許家傑行街　林淑敏認衰：唔應該周圍去

適逢七夕，TVB處境劇《愛．回家之開心速遞》今日舉行「七夕約會」宣傳活動，「大小姐」林淑敏透露放工後，會跟丈夫於二人限聚令下渡過七夕。對於早前被拍得與「送水輝」許家傑雙雙逛街，而傳出二人戲假情真，林淑敏即「認衰」表示：「其實我哋都有唔啱，應該食飯就食飯，唔好周圍行去Shopping。」許家傑就打趣道：「個結論係，下次要着得靚啲！」並強調跟林淑敏的關係就如親人一樣，還記得對方送自己到醫院。

至於另一半有何想法？林淑敏笑謂：「佢第一個反應係：『你就好啦，有得出街！我喺屋企好悶。』」而一向低調處理感情事的許家傑指女友沒有甚麼反應。